काठमाडौं। नेपाल बैंक लिमिटेडले आफ्नो ९०औँ वार्षिकोत्सवको अवसर पारेर सर्वसुलभ आवास कर्जा योजना सार्वजनिक गरेको छ। बैंकले घर निर्माण, घर खरिद तथा अपार्टमेन्ट खरिद गर्न चाहने ग्राहकलाई लक्षित गर्दै उक्त योजना ल्याएको हो।
बैंकले सार्वजनिक गरेको योजनाअनुसार ग्राहकले घर खरिद, घर निर्माण तथा मर्मत र अपार्टमेन्ट खरिदका लागि कर्जा लिन सक्नेछन्। कर्जाको ब्याजदर आधार दरमा शून्य दशमलव २५ प्रतिशत प्रिमियम थप गरी निर्धारण गरिने बैंकले जनाएको छ। उक्त कर्जाको अवधि अधिकतम २५ वर्षसम्म रहनेछ।
योजनाअन्तर्गत कर्जा लिने ग्राहकले बैंकबाट पाँच लाख रुपैयाँसम्मको लाइफटाइम निःशुल्क क्रेडिट कार्ड सुविधा प्राप्त गर्न सक्नेछन्। साथै, वार्षिक शुल्कमा ५० प्रतिशत छुटसमेत उपलब्ध गराइने बैंकले जनाएको छ।
बैंकका अनुसार यो आवास कर्जा योजना २०८३ कात्तिक १५ गतेदेखि २०८३ माघ १५ गतेसम्म लागू हुनेछ। योजनाअन्तर्गत ग्राहकले तोकिएका सर्त तथा मापदण्ड पूरा गरी आवास कर्जा सुविधा लिन सक्नेछन्।
नेपालको पहिलो बैंकका रूपमा परिचित नेपाल बैंक लिमिटेडले देशभर २३१ शाखा, २५० एटीएम तथा ५८ एक्सटेन्सन काउन्टरमार्फत करिब ३० लाख ग्राहकलाई वित्तीय सेवा प्रदान गर्दै आएको जनाएको छ। बैंकले आधुनिक बैंकिङ प्रविधिको प्रयोग, सेवा विस्तार तथा ग्राहक सेवामा सुधार गर्दै आएको पनि विज्ञप्तिमा उल्लेख छ।
बैंकले दक्ष जनशक्ति, आधुनिक प्रविधि र दिगो व्यवस्थापनलाई प्राथमिकता दिँदै गुणस्तरीय वित्तीय सेवा प्रदान गरिरहेको जनाएको छ। वार्षिकोत्सवको अवसरमा सार्वजनिक गरिएको यो योजनाले घर निर्माण तथा खरिद गर्न चाहने सर्वसाधारणलाई सहुलियतपूर्ण आवास वित्तीय सेवामा पहुँच बढाउन सहयोग पुग्ने बैंकको अपेक्षा छ।
