कृष्ण कुँवर (कर्नेलियस)- पर्वतको मोदी गाउँपालिका–२, पातिचौरमा ग्लोबल पर्वत समाजको मुख्य आयोजनामा बृहत् निःशुल्क स्वास्थ्य शिविर सञ्चालन हुने भएको छ।
२०८३ साल कार्तिक १४ गते शनिबार श्री देउपुर नमुना अंग्रेजी आवासीय माध्यमिक विद्यालय, पातिचौरमा स्वास्थ्य शिविर आयोजना गर्न लागिएको हो।
शिविरमा मुटुरोग परीक्षण तथा परामर्श, मधुमेह (सुगर) परीक्षण, रक्तचाप (प्रेसर) जाँच, स्त्री तथा प्रसूति स्वास्थ्यसम्बन्धी सेवा, नाक, कान तथा घाँटीसम्बन्धी परीक्षण तथा परामर्श र सामान्य (जनरल) रोगसम्बन्धी परीक्षण तथा परामर्श निःशुल्क उपलब्ध गराइने आयोजकले जनाएको छ।
शिविरका लागि ओम मेगाश्री फार्मास्युटिकल्स, मेडिप्लस हस्पिटल ट्रमा सेन्टर तथा नेइको पोलिक्लिनिक, दुबई यूएईले प्राविधिक सहयोग गर्नेछन्। मोदी गाउँपालिका र श्री देउपुर नमुना अंग्रेजी आवासीय माध्यमिक विद्यालयले व्यवस्थापनमा सहयोग गर्ने जनाइएको छ।
समयमै स्वास्थ्य परीक्षण गरी सम्भावित स्वास्थ्य समस्या पहिचान गर्न तथा आवश्यक स्वास्थ्य परामर्श उपलब्ध गराउने उद्देश्यले शिविर आयोजना गर्न लागिएको आयोजकले जनाएको छ।
आयोजकले मोदी गाउँपालिका तथा आसपासका क्षेत्रका स्थानीय बासिन्दालाई शिविरमा सहभागी भई निःशुल्क स्वास्थ्य परीक्षण तथा परामर्श सेवा लिन आग्रह गरेको छ।
