काठमाडौं। अब नागरिकताको प्रमाणपत्र हराएका, नष्ट भएका वा विभिन्न कारणले प्रतिलिपि लिनुपर्ने नागरिकले देशका जुनसुकै जिल्ला प्रशासन कार्यालयबाट प्रतिलिपि प्राप्त गर्न सक्ने भएका छन्।
नेपाल सरकारको १०० बुँदे शासकीय सुधार कार्यसूचीको बुँदा नम्बर २१ तथा नेपाल नागरिकता (पाँचौँ संशोधन) नियमावली, २०८३ बमोजिम सरकारले यस्तो व्यवस्था कार्यान्वयनमा ल्याएको हो।
नागरिकताको प्रमाणपत्र आगोले जलेर, पानीले भिजेर, च्यातिएर नष्ट भएको, हराएको, नयाँ ढाँचामा आवश्यक परेको वा अन्य कारणले प्रतिलिपि लिनुपर्ने अवस्थाका नागरिकले यस सुविधाबाट लाभ लिन सक्नेछन्।
गृह मन्त्रालयको २०८३ कात्तिक ९ गतेको परिपत्र अनुसार काठमाडौं उपत्यकामा बसोबास गर्ने अन्य जिल्लाका नागरिकलाई सहज सेवा उपलब्ध गराउन तीन जिल्ला प्रशासन कार्यालयबाट प्रदेशगत रूपमा सेवा प्रवाहको व्यवस्था मिलाइएको छ।
जस अनुसार जिल्ला प्रशासन कार्यालय काठमाडौंमार्फत बागमती, गण्डकी र लुम्बिनी प्रदेशका नागरिकले सेवा लिन सक्नेछन्। त्यस्तै, जिल्ला प्रशासन कार्यालय ललितपुरबाट कर्णाली र सुदूरपश्चिम प्रदेशका तथा जिल्ला प्रशासन कार्यालय भक्तपुरबाट कोशी र मधेश प्रदेशका नागरिकलाई सेवा उपलब्ध गराइनेछ।
सम्बन्धित आवेदकको जैविक विवरण राष्ट्रिय परिचय व्यवस्थापन सूचना प्रणाली र केन्द्रीय नागरिकता सूचना व्यवस्थापन प्रणालीमा रहेको विवरणसँग हुबहु मिलेमा नागरिकताको प्रतिलिपि सहज रूपमा जारी गरिनेछ।
तर, अभिलेखमा विवरण नमिलेको, साविकको नागरिकतामा उल्लेख भएको नाम, थर, जन्ममिति वा अन्य विवरण भन्दा फरक विवरण राखेर प्रतिलिपि लिन खोजिएको वा आवेदन शंकास्पद देखिएको अवस्थामा भने नागरिकता जारी भएको साविककै जिल्ला प्रशासन कार्यालयमा सम्पर्क गर्नुपर्नेछ।
