हेटौंडा । राष्ट्रिय स्वतन्त्र पार्टी (रास्वपा) हेटौंडा उपमहानगरपालिकाको नगर उपसभापतिमा झण्डै दुईतिहाइ मतसहित विजयी भएका युवा (जेन–जी) नेताका रूपमा परिचित सागर लामिछानेको विजयसँगै नगरको राजनीतिक माहोलमा नयाँ तरंग देखिएको छ।
लामो समयदेखि राजनीतिमा सक्रिय रहँदै आएका लामिछानेको विजयलाई युवा नेतृत्वप्रतिको विश्वास र समर्थनका रूपमा हेरिएको छ। उनको नेतृत्वमा नगरस्तरमा पार्टी संगठन थप सुदृढ हुने अपेक्षा गरिएको छ। विजयपछि रास्वपाप्रति युवाहरूको आकर्षण बढ्दै गएको स्थानीय राजनीतिक वृत्तमा चर्चा हुन थालेको छ। विभिन्न क्षेत्रका नागरिक तथा युवाहरू पार्टीमा आबद्ध हुन इच्छुक देखिएका छन् भने नयाँ सदस्यता र संगठन विस्तारका गतिविधिमा समेत उत्साह थपिएको बताइएको छ।
यसैबीच, लामिछानेको विजयको प्रभाव आगामी जिल्ला अधिवेशनसम्म देखिन थालेको स्रोतहरूले बताएका छन्। जिल्ला अधिवेशनलाई लक्षित गर्दै विभिन्न आकांक्षीहरू लामिछानेको समर्थन प्राप्त गर्न अनौपचारिक रूपमा लबिङमा जुटिसकेको एक व्यक्तिले जानकारी दिएका छन्।
रास्वपाका एक कार्यकर्ताका अनुसार, “हेटौंडा नगर अधिवेशनको परिणामपछि सागर लामिछानेको राजनीतिक प्रभाव उल्लेखनीय रूपमा बढेको छ। अब जिल्ला अधिवेशनमा उनको समर्थन वा असमर्थनले उम्मेदवारहरूको सम्भावना र परिणाममा समेत प्रभाव पार्न सक्ने अवस्था देखिएको छ।”
स्थानीय राजनीतिमा नयाँ पुस्ताको प्रभावशाली उपस्थितिको संकेतका रूपमा हेरिएको यो परिणामले आगामी दिनमा हेटौंडाको राजनीतिक दिशा, संगठनात्मक समीकरण तथा नेतृत्व चयन प्रक्रियामा समेत महत्वपूर्ण प्रभाव पार्ने विश्लेषण हुन थालेको छ। युवा नेतृत्वको उदयसँगै रास्वपाभित्र नयाँ राजनीतिक ध्रुवीकरण र समीकरण बन्न सक्ने आकलन पनि गरिएको छ।
