दिपेश श्रेष्ठ,काठमाडौं । जेनजी २.० ले मताधिकार केवल अधिकार मात्र नभई जिम्मेवारी भएको भन्दै मत माग्न आउने उम्मेदवारलाई कडा प्रश्न गर्न आम नागरिकलाई अपिल गरेको छ।
जेनजी २.० का प्रबक्ता अविन लिम्बुका अनुसार आगामी निर्वाचनमा उम्मेदवारले भाषण र नाराबाट होइन, लिखित सहमतिबाट जनताको विश्वास जित्नुपर्छ। संगठनले घोषणा पत्र सार्वजनिक नगर्ने, नागरिक सरोकारवालासँग लिखित प्रतिबद्धता नगर्ने र जितेपछि जवाफदेह नहुने उम्मेदवारलाई समर्थन नगर्न आग्रह गरेको छ।
जेनजी २.० ले उठाएका मुख्य प्रश्नहरूमा “घोषणा पत्र कहाँ छ?”, “जनतासँग गरिएको प्रतिबद्धता कहाँ लेखिएको छ?” र “जवाफदेहिता कसरी सुनिश्चित हुन्छ?” रहेका छन्। संगठनको धारणा अनुसार उम्मेदवारले नागरिकसँग नेपाली कागजमै सहमति गर्नुपर्छ र त्यो सहमति सार्वजनिक, पढ्न मिल्ने र आवश्यक परे सम्झाउन सकिने हुनुपर्छ।
जेनजी २.० ले अब ‘भोट हाल्नुहोस्’ भन्ने अपिल मात्र पर्याप्त नहुने बताउँदै के गर्ने, कसरी गर्ने र कहिले गर्ने भन्ने विषय स्पष्ट हुनुपर्ने जनाएको छ। संगठनले मत दिनुअघि प्रश्न गर्न, कागजमा सहमति खोज्न र जवाफदेहिता बिना समर्थन नगर्न आम नागरिकलाई आग्रह गरेको छ।
“यो चुनाव व्यक्तिको होइन, प्रणालीको परीक्षा हो,”लिम्बुले जनाएका छन। संगठनले आफू सचेत नागरिक र जिम्मेवार लोकतान्त्रिक अभ्यासको पक्षमा दृढ रूपमा उभिएको पनि स्पष्ट पारेको छ।
