काठमाडौं । नेकपा माओवादी केन्द्रको केन्द्रीय कार्यालय पेरिसडाँडामा गत शुक्रबारदेखि जारी बैठकमा बोल्ने २५ नेताहरूले नेकपा माओवादी केन्द्रका उपमहासचिव जनार्दन शर्माले आत्मालोचना गर्नुपर्ने बताएका छन् ।
शनिबारको बैठकमा पाँच जना पदाधिकारी, अनुशासन आयोगका अध्यक्ष, १९ जना स्थायी कमिटी सदस्यसहित २५ जनाले धारणा राखेका छन् ।
जसमध्ये अधिकांशले उपमहासचिव शर्माको पछिल्लो अभिव्यक्तिको आलोचना गर्दै पार्टी अध्यक्ष पुष्पकमल दाहाल प्रचण्डको विकल्प खोज्ने बेला नभएको मत राखेका छन् । यसअघि उपमहासचिव शर्माकै पक्षमा मत राख्दै आएकाहरूले समेत यसपटक आलोचना गरेका स्रोतले अनलाइनखबरलाई बतायो ।
‘यसअघि जनार्दन शर्माकै पक्षका भनिएका स्थायी कमिटी सदस्यहरूले पनि उहाँको अभिव्यक्तिको आलोचना गर्नुभयो, पार्टीभित्रको आन्तरिक मनमुटावलाई बाहिरी फोरममा बोलेर गल्ती गरेको भनेर आत्मालोचना गर्नुपर्ने मत राख्नुभयो’, स्रोतले भन्यो ।
प्रतिगमन, प्रतिगामीविरुद्ध बोल्नुपर्ने बेला बाहिर नेतृत्वको आलोचना गर्दै हिँड्न नहुने भन्दै बैठकमा धारणा राख्ने पदाधिकारी र स्थायी कमिटी सदस्यहरू उपमहासचिव शर्मामाथि खनिएका थिए ।
