१६ मिनेट लामो यो गीत कुनै म्युजिक भिडियो भन्दा पनि ‘म्युजिकल फिल्म’ बढी हो जहाँ कथानक फिल्म निर्माणका लागि आवश्यक सबै आधारभूत व्याकरणीय तत्व मिसाइएको छ ।
यो म्युजिकल फिल्ममा हिन्दु युवती र मुसलमान युवकबीचको प्रेम सम्बन्ध र हार्दिकतालाई प्रस्तुत गरिएको छ । आफ्ना गीतहरुमा सामाजिक यथार्थ र सन्देश समेट्दै आएका पंगेनीको नयाँ गीत पनि त्यसकै एक श्रृंखला हो ।
रोचक के छ भने- यो म्युजिक फिल्म मार्फत पंगेनीकी छोरी बिहानीले अभिनयमा डेब्यु गरेकी छन् । उनको अभिनय शैली प्रशंसायोग्य छ । बद्रीले आफ्नो नामको बीचमा समेत कुमार थपेका छन् । भिडियोको निर्देशन र गीतमा संगीत पनि उनैले भरेका हुन् ।
नारायण ज्ञवालीको शब्द रहेको गीतमा पंगेनी र समीक्षा अधिकारीको स्वर छ । प्रशान्त मगरको नृत्य निर्देशन रहेको गीतको भिडियोमा प्रभात पल ठकुरी, बिहानी पंगेनी, अशोक पंगेनी, हमिद मियाँ, भवानी पंगेनी, श्याम पटेलले अभिनय गरेका छन् ।
बद्री पंगेनी युट्युव च्यानलबाट गीत सार्वजनिक गरिएको हो । एलएलबी अध्ययनरत बिहानीले राजनीतिमा रूचि राख्ने जनाइएको छ । उनी सत्तारुढ दल एमाले निकट अनेरास्ववियुको केन्द्रीय सदस्य समेत हुन् । गीत सार्वजनिक हुने वित्तिकै बिहानीले सामाजिक संजालबाट प्रशंसा पाइरहेकी छिन् ।
