डिकेन्द्र बस्नेत, झापा । तामाङ समुदायको संस्कृति, विवाह प्रथा, र परम्परालाई उजागर गर्ने नेपाली चलचित्र “चारदाम” को प्रिमियर सो बिहीबार दमकको डि म्याक्स हलमा सम्पन्न भएको छ । नेपाल तामाङ घेदुङ दमक नगर समितिले आयोजना गरेको सो कार्यक्रममा चलचित्र निर्माण टोली तथा कलाकारहरु दर्शकहरूसँग सहभागी भएका थिए।
चलचित्र “चारदाम” तामाङ संस्कृतिमा आधारित छ र यसको मुख्य उद्देश्य तामाङ समुदायको संस्कार र संस्कृतिको जगेर्ना गर्नु हो। चलचित्रमा सहायक नायिकाको भूमिकामा अभिनय गर्ने मोडल तथा नायिका शान्ति पाख्रिन लामा, निर्देशक तथा पत्रकार डिकेश लामा, द्वन्द्व निर्देशक कलाकार तथा खेलाडी नविन तामाङ, अनुप योञ्जन, श्याम गिरी, दुर्गा तामाङलाई सोही अवसरमा चलचित्र निर्माण टोलीले सम्मानपत्रका साथ सम्मान पनि गरेको छ।
चलचित्रको मुख्य विषयवस्तु तामाङ विवाह प्रथा “चारदाम” हो, जुन तामाङ समुदायमा विवाहमा गरिने एक विशेष वाचा हो। चलचित्रका निर्देशक लाखमान योञ्जन तामाङले यसको उद्देश्य तामाङ समुदायको विविधतामा एकरुपता ल्याउनु रहेको बताएका छन् ।
लेखक तथा निर्देशक तामाङले पत्रकार सम्मेलनमा जानकारी दिँदै भने कि तामाङ समुदायको संस्कृति र संस्कारको जगेर्ना तथा प्रवर्द्धन गर्ने उद्देश्यले चारदाम चलचित्र निर्माण गरिएको हो। उनले थपे कि यसअघि निर्माण गरिएका धेरै चलचित्रहरू अलिक बढी व्यावसायिक (कमर्सियल) धारका थिए, तर यस चलचित्रले तामाङ समुदायमा सम्बन्ध विकास र सुदृढीकरणको काम गरेको छ ।
देशभरका तामाङ समुदायमा बोलिने शब्द र भाषामा केही फरक भए पनि, यस चलचित्रले संस्कृतिको एकरूपता ल्याउने प्रयास गरेको छ। नेपालका विभिन्न शहरहरूमा मात्र नभई विदेशमा पनि चलचित्रको प्रदर्शन गरिने योजना बनिसकेको जानकारी उनले दिए।
चलचित्रले पूर्वी नेपालको तामाङ समुदायको जीवनशैली, दोस्रो विवाहको चलन, र एकल महिलाको समस्यालाई उजागर गरेको छ। “चारदाम” को ९८ प्रतिशत छायांकन भोजपुरमा गरिएको हो, र करिब ५० लाख रुपैयाँको लागतमा निर्मित यस चलचित्रले तामाङ समुदायको विभिन्न सांस्कृतिक पक्षलाई समेटेको सहनिर्माता कुमारी लिम्बूले बताइन ।
नायिका पाख्रिनले जानकारी दिँदै भनिन् कि तामाङ समुदायमा “चारदाम” परम्परा विवाहमा महत्वपूर्ण भूमिका खेल्छ। अन्य समुदायमा कन्यादान जसरी गरिन्छ, तामाङ समुदायमा चारदाम भन्ने परम्परा सदियौंदेखि चल्दै आएको छ। यो परम्पराअन्तर्गत समाजका भद्रभलाद्मी, बेहुली तर्फका माइती र मावलीसँग विशेष वाचा गरिन्छ। यो परम्परा बाजेबराजुदेखि निरन्तर रूपमा तामाङ विवाह संस्कारमा अभ्यास हुँदै आएको छ ।
कोशी भिजन फिल्म्सको प्रस्तुतिमा बनेको चलचित्र चारदामले पोखरा, विराटनगर, चक्रघटी, धरान, इटहरी र भोजपुरमा अपार सफलता प्राप्त गरेपछि अब दमकमा पनि प्रिमियर सो हुने जानकारी दिइएको छ । पत्रकार सम्मेलनमार्फत चलचित्र युनिटले आज बिहीबार जानकारी दिँदै भन्यो कि चलचित्रको प्रिमियर सो १९ गते भद्रपुरको सिनेमा हलमा हुनेछ।
