भक्तपुर । आउँदो वैशाख ३० गते स्थानीय तहको निर्वाचनका लागि अन्य जिल्लामा जस्तै भक्तपुरमा पनि राजनीतिक दलहरु आन्तरिक तयारीमा जुटेका छन् । भक्तपुरमा नेकपा एमाले, नेपाली काँग्रेस, नेमकिपा, नेकपा माओवादी केन्द्र, राप्रपा, नेकपा एकीकृत समाजवादी, राप्रपा नेपाललगायतका दल निर्वाचन केन्द्रित कार्यक्रममा व्यस्त हुन थालेका छन् ।
नेमकिपाकी उम्मेदवार मनशोभा सुवालले २ हजार २ सय ८०, राप्रपाका प्रविण शर्मा ढुंगेलले २ हजार १ सय ६९ र नेकपा माओवादीका जीवन तलले १ हजार ३ सय ८४ मत ल्याएका थिए ।
मध्यपुरथिमी नगरपालिका :-
२०७४ सालको निर्वाचनमा ९ वटा वडा रहेको यस नगरपालिकामा ६ वडामा नेपाली काँग्रेसका उम्मेदवार विजयी भएका थिए । स्वतन्त्र, एमाले र नेमकिपाले १/१ वडा जितेका थिए । खसेकाे कुल मत मध्य २६०७८ बाट नगरप्रमुखमा एमालेका मदन सुन्दर (जुगुलु) श्रेष्ठले १४ हजार मत ल्याएर विजयी हुँदा काँग्रेसका अष्टकुमार कवेले १० हजार ८ सय ४६ मत हासिल गरेका थिए । यस्तै, नेकपा माओवादी केन्द्रकी प्रतिमा श्रेष्ठले १ हजार २ सय ३२ मत ल्याएकी थिइन् । यो नगरमा एमाले र नेमकिपाबीच तालमेल भएको थियो ।काँग्रेसका उम्मेदवारले भने पार्टीको अन्तरघातको कारण आफू पराजय हुनु परेको बताएका थिए । नगरउपप्रमुखमा भने काँग्रेसकी अन्जनादेवी मधीकर्मीले जित हासिल गरेकी थिइन् ।
एमालेलाई पनि सहज छैन :-
अघिल्लो निर्वाचनमा चाँगुनारायण र सूर्यविनायक नगरपालिकामा बहुमत सहित जितेको एमालेलाई आउँदो निर्वाचन त्यति सहज देखिएको छैन । पार्टी विभाजन व्यहोरेको एमालेलाई आगामी स्थानीय तहको निर्वाचनमा त्यसको असर कति पर्ने हो भन्ने प्रस्ट छैन ।एमाले विभाजन भएर बनेको दल नेकपा एकीकृत समाजवादीले सबै तहमा कमिटी बनाएर चुनावी तयारी थालेको छ । नेकपा एकीकृत समाजवादीमा एमालेकै पूर्व कार्यकर्ता रहेका कारण पनि सो पार्टीले एमालेकै मत खोस्ने निश्चित छ । यो अवस्थामा एमालेका लागि जित त्यति सहज नहुने आँकलन गरिएको छ ।
काँग्रेसलाई एमसीसीको डर :
संसदबाट एमसीसी पास गर्न भूमिका खेलेको भन्दै काँग्रेसका कतिपय समर्थक रुष्ट देखिन्छन् । पार्टीको निर्णयविरुद्ध उनीहरु खुलेर बोल्न नसके पनि चुनावमा त्यसको असर देखिने धेरैको आँकलन छ ।काँग्रेसमा अन्तरघात पनि पुरानै रोगका रुपमा देखिन्छ । पार्टीको १४ औं महाधिवेशन अन्तर्गत वडा तथा नगर समितिका अधिवेशनको हिसाबकिताब बाँकी रहेको भन्दै केहीले नेताले स्थानीय तहको निर्वाचनलाई बदला लिने अवसरका रुपमा प्रयोग गर्न चाहेका छन् ।
३६४ दिन काँग्रेस बन्ने तर, मतदानको दिन अर्को पार्टीलाई सघाउने प्रवृत्ति कायम रहेमा पार्टीका उम्मेदवार जिताउन सकस हुने कतिपय काँग्रेस नेता बताउँछन् । राप्रपासँग मिलेर उपनिर्वाचन जितेकाले पनि चाँगुनारायण नगरमा राप्रपालाई मिलाउन काँग्रेसका लागि ठुलो चुनौती देखिन्छ ।
नेमकिपालाई भक्तपुर नगरमा बर्षाैँ देखि ढुक्क :
नेपाल मजदुर किसान पार्टी (नेमकिपा) भक्तपुर नगरमा जित्नेमा ढुक्क देखिन्छ । विगतका निर्वाचनमा भने भक्तपुर जिल्लामा राम्रै उपस्थिति जनाएको यो पार्टीले अघिल्लो निर्वाचनमा चाँगुनारायण र मध्यपुरमा १/१ वडामात्रै जितेको थियो । भक्तपुरमा १० वटै वडामा जितेको यो पार्टी अन्य नगरमा भने तेस्रो शक्तिको रुपमा देखिन्छ ।
माओवादी, राप्रपा, नेकपा एकीकृत समाजवादी जनमत जुटाउदै :
एमालेबाट छुट्टिएर बनेको नेकपा एकीकृत समाजवादी पार्टी जनताबीच परीक्षण हुने तयारीमा छ । पार्टी विभाजनका समयमा भक्तपुरका निर्वाचित जनप्रतिनिधिमध्ये एक जना प्रदेश सांसद र एक जना वडा सदस्यले मात्र एमाले छाडेर नेकपा एकीकृत समाजवादी रोजेका थिए ।नेकपा माओवादी केन्द्र भक्तपुरमा विगतदेखि नै सक्रिय भए पनि निर्वाचनमा भने जित हासिल गर्न सकिरहेको छैन । यस पटक गठबन्धन गरेर भए पनि केही सिट जित्ने दाउमा माओवादी केन्द्रका नेताहरु लागिपरेका छन् ।
राप्रपाको बलियो आधार क्षेत्र नै चाँगुनारायण नगरपालिका हो । विगतका निर्वाचनमा पनि केही वडामा प्रतिस्पर्धामा देखिएकाले राप्रपा यो पटक इतिहास रच्ने दाउमा छ । तर, कमल थापा नेतृत्वमा पार्टी विभाजन भएका कारण राप्रपाले पनि कुनै चमत्कार गर्नेमा आशंका देखिन्छ ।
