काठमाडौं । प्रमुख विपक्षी नेकपा एमालेले स्थानीय चुनावकेन्द्रित अभियानमा जुटेको छ । केन्द्रीय सचिवालय बैठकले स्थानीय चुनाव केन्द्रित विभिन्न निर्णय गरेलगत्तै स्थानीय चुनावको घोषणापत्र तयारीबारे कार्यशाला आयोजना गरेको हो ।
वरिष्ठ उपाध्यक्ष ईश्वर पोखरेल नेतृत्वको नीति अनुसन्धान प्रतिष्ठानले बुधबार स्थानीय तहका छाता संगठनका नेताहरूसहित घोषणापत्रको प्रारम्भिक मस्यौदाको अवधारणा बनाउन लागेको हो ।
बुद्धिजिवी परिषद्को प्रस्तावमा आयोजित कार्यशालमा घोषणापत्रमा समेटिने विषयहरूमाथि नै छलफल भइरहेको नगरपालिका संघका अध्यक्षसमेत रहेका धुलिखेल नगरपालिकाका मेयर अशोक ब्यान्जुले बताए ।
स्थानीय तहको चुनावका लागि केन्द्रीय कार्यालयको तर्फबाट केन्द्रीय घोषणापत्र तयार पार्ने र ७५३ स्थानीय तहको लागि एउटै फर्म्याटमा यसबीचमा गरिएका कामको विवरण र गर्ने कामको प्रस्तावसहितको प्रतिबद्धतापत्र एकैसाथ जारी गरिने एमाले प्रचार विभाग प्रमुख पृथ्वीसुब्बा गुरुङले जानकारी दिए । कार्यशालमा पार्टीका वरिष्ठ नेताहरू, योजना आयोगका पूर्वपदाधिकारीका साथै विज्ञहरू सहभागी छन् ।
