बैशाख३०,काठमाण्डाै।
प्रधानमन्त्री केपी शर्मा ओलीले संसदमा विश्वासको मत प्राप्त गर्न नसकेपछि राष्ट्रपति विद्यादेवी भण्डारीले नयाँ सरकार गठनका लागि दिएको तीन दिनको समय बिहीबार (आज) राती नौ बजे सकिँदै छ ।
विपक्षी दलबीच सहमति हुन नसक्दा अहिलेसम्म नयाँ सरकार गठनका लागि कसैले विकल्प प्रस्तुत गर्न सकेका छैनन्।
कांग्रेस र माओवादी मिल्दा मात्र सरकार गठनका लागि संख्या पुग्दैन भने जसपाको उपेन्द्र पक्षसमेत मिल्दा जम्मा १२४ जना सांसद मात्र पुग्छन ।
जसपा कै महन्थ ठाकुर समुहले सरकारका लागि गरिने गठबन्धनमा सामेल नहुने कुरा सार्वजानिक रुपमै भनिरहेकाे छ ।
यो अवस्थामा आज राती नौ बजेसम्म संविधानको धारा ७६(२) अनुसार सरकार बन्न सक्ने अवस्था बिलकुल देखिँदैन ।
यो प्रक्रियाबाट सरकार नबन्ने बित्तिकै संविधानको धारा ७६(३) सक्रिय हुन्छ र संसदको सबैभन्दा ठूलो पार्टीको संसदीय दलको नेताको रूपमा प्रधानमन्त्री केपी शर्मा ओलीले पुन: शपथ ग्रहण गर्नुपर्ने देखिन्छ। बनेको प्रधानमन्त्रीले ३० दिनभित्रमा संसदमा विश्वासको मत लिनुपर्नेहुन्छ ।
