काठमाडौं । नेपाल राष्ट्र बैंकले तिहार पर्वलाई लक्षित गर्दै आज (बिहीबार) देखि सुन तथा चाँदीका विशेष सिक्का बिक्री सुरु गर्ने भएको छ। राष्ट्र बैंकको टक्सार महाशाखाले सर्वसाधारणका लागि दुई दिनसम्म सुनको असर्फी र चाँदीका मेडालियन बिक्री गर्न लागेको हो।
बबरमहलस्थित टक्सार महाशाखाबाट बिहान ११ बजेदेखि दिउँसो ३ बजेसम्म सिक्का खरिद गर्न सकिने व्यवस्था मिलाइएको राष्ट्र बैंकले जनाएको छ। राष्ट्र बैंकका कार्यकारी निर्देशक अनुज दाहालका अनुसार आज र भोलि दुई दिनसम्म सिक्का बिक्री गरिनेछ।
तिहारका अवसरमा सुन तथा चाँदीका सिक्का वा धातु खरिद गर्नु शुभ मानिने धार्मिक विश्वास छ। यही मान्यताअनुसार सर्वसाधारणले धनधान्यकी देवी लक्ष्मीको प्रतीकका रूपमा यस्ता सिक्का खरिद गरी पूजा गर्ने प्रचलन रहेकाले राष्ट्र बैंकले हरेक वर्ष विशेष व्यवस्था गरी सिक्का बिक्री गर्दै आएको छ।
गत वर्ष सुनको अभावका कारण राष्ट्र बैंकले चाँदीका सिक्का मात्रै बिक्री गरेको थियो। यस वर्ष भने वाणिज्य बैंकहरूबाट ३५ किलो सुन खरिद गरी त्यसबाट असर्फी तयार पारेर बिक्री गर्न लागिएको कार्यकारी निर्देशक दाहालले जानकारी दिए। उनका अनुसार यसपटक लक्ष्मी, गजलक्ष्मी र गणेशको आकृति अंकित चाँदीका सिक्का पनि बिक्री गरिनेछन्।
राष्ट्र बैंकका अनुसार एक जना व्यक्तिले २.५ ग्राम तौलको एउटा सुनको असर्फी र १० ग्राम तौलका बढीमा तीनवटा चाँदीका सिक्का खरिद गर्न सक्नेछन्। असर्फी तथा मेडालियनको मूल्य बिक्री हुने दिनको सुन र चाँदीको बजार मूल्यका आधारमा निर्धारण गरिनेछ। सिक्का निर्माणमा लागेको खर्चसमेत जोडिने भएकाले यस्ता सिक्काको मूल्य प्रचलित बजार मूल्यभन्दा केही बढी हुने राष्ट्र बैंकले स्पष्ट पारेको छ।
सिक्का खरिद गर्न इच्छुक सर्वसाधारणले नेपाली नागरिकता, राष्ट्रिय परिचयपत्र वा नम्बर स्पष्ट खुलेको अन्य आधिकारिक परिचयपत्रको प्रतिलिपिसहित स्वयं उपस्थित हुनुपर्नेछ। खरिदकर्ताले नगद वा क्यूआर कोडमार्फत भुक्तानी गर्न सक्ने व्यवस्था मिलाइएको राष्ट्र बैंकले जनाएको छ।
