कृष्ण कुँवर पर्वत। ग्लोबल पर्वत समाजको आयोजना, मोदी गाउँपालिकाको व्यवस्थापन तथा श्री देउपुर नमुना आवासीय माध्यमिक विद्यालयको सहकार्यमा सञ्चालित निःशुल्क स्वास्थ्य शिविरबाट चार सयभन्दा बढी नागरिक लाभान्वित भएका छन्।
मोदी गाउँपालिका–स्थित देउपुर नमुना आवासीय माध्यमिक विद्यालयमा शनिबार आयोजित शिविरमा विभिन्न रोगका विशेषज्ञ चिकित्सकहरूले स्वास्थ्य परीक्षण तथा परामर्श सेवा प्रदान गरेका थिए। शिविरमा नाक, कान, घाँटी, मुटु, फोक्सो, नसा, मधुमेह, उच्च रक्तचाप तथा स्त्रीरोगलगायतका समस्या परीक्षण गरिएको थियो। साथै ईसीजी, यूएसजी, सुगर र प्रेसर परीक्षणसमेत गरिएको थियो।
कार्यक्रमकी प्रमुख अतिथि गाउँपालिका अध्यक्ष हीरा देवी शर्माले गाउँमै विशेषज्ञ चिकित्सक र आधुनिक उपकरणसहित स्वास्थ्य सेवा उपलब्ध गराउनु महत्वपूर्ण उपलब्धि भएको बताउँदै आयोजक तथा सहयोगी संस्थालाई धन्यवाद दिइन्।
ग्लोबल पर्वत समाजका संस्थापक अध्यक्ष पुरन गिरी, पूर्वअध्यक्ष झलक केसी, प्रमुख संरक्षक गुणराज शर्मा (गुराँस पौडेल), संरक्षक अर्जुनकुमार श्रेष्ठ तथा अध्यक्ष दधी आचार्यले प्रवासमा रहेर पनि जन्मभूमिको स्वास्थ्य र सामाजिक सेवामा योगदान गर्न पाउनु गौरवको विषय भएको बताए।
समाजका उपाध्यक्ष एवं मोदी गाउँपालिका संयोजक रुद्रमणि लम्सालको अध्यक्षतामा सम्पन्न कार्यक्रमको सञ्चालन उपाध्यक्ष दिनेशराज रेग्मीले गरेका थिए।
शिविरमा ओम मेगाश्री फार्मास्युटिकल्स, मेडिप्लस हस्पिटल एन्ड ट्रमा सेन्टर तथा निको पोलिक्लिनिक, दुबई यूएईको प्राविधिक सहयोग रहेको थियो। समाजले आगामी दिनमा पनि शिक्षा, स्वास्थ्य तथा सामाजिक सेवाका कार्यक्रमलाई निरन्तरता दिने जनाएको छ।
