जनकपुरधाम । धनुषाको क्षीरेश्वरनाथ नगरपालिका–१ का ३८८ परिवारले नाप नक्सा सम्पन्न भएको सात वर्षपछि जग्गाधनी प्रमाणपुर्जा पाएका छन् ।
साविक रमदैया भवाडी गाविसका वडा नं. २, ३, ४, ६, ७ र ८ का ती परिवारको जग्गाको नाप नक्सा विसं २०७४ मै सम्पन्न भएको थियो । तर, विभिन्न कारणले जग्गा दर्ता प्रक्रिया पूरा हुन नसक्दा उनीहरूले लामो समयसम्म जग्गाधनी प्रमाणपुर्जा पाउन सकेका थिएनन् ।
क्षीरेश्वरनाथ नगरपालिकामा आयोजित कार्यक्रममा नगरप्रमुख सुखदेव यादवले सम्बन्धित जग्गाधनीलाई प्रमाणपुर्जा वितरण गरेका हुन् । नाप नक्सा सम्पन्न भइसकेका नगरपालिका–२ का थप २४२ परिवारलाई पनि आइतबार जग्गाधनी प्रमाणपुर्जा वितरण गर्ने तयारी रहेको नापी कार्यालय धनुषाका प्रमुख उमेशकुमारले जानकारी दिए ।
नाप नक्सा सम्पन्न भए पनि दर्ता प्रक्रिया पूरा हुन नसकेका गाउँ ब्लक क्षेत्रका जग्गाको समस्या समाधान गर्दै जग्गाधनीलाई प्रमाणपुर्जा वितरणको काम अघि बढाइएको उनले बताए । लामो समयदेखि जग्गाधनी प्रमाणपुर्जा प्राप्त गर्न नसकेका परिवारलाई प्रक्रिया पूरा गरी पुर्जा वितरण गर्न थालिएको उनको भनाइ छ ।
यसअघि भदौ २९ गते हंसपुर नगरपालिका–५, साविक सुगा निकास गाविस–३ का ३६५ परिवारलाई पनि जग्गाधनी प्रमाणपुर्जा वितरण गरिएको थियो । नाप नक्सा सम्पन्न भइसकेका तर दर्ता प्रक्रिया बाँकी रहेका गाउँ ब्लक क्षेत्रका जग्गाको समस्या क्रमशः समाधान गर्दै प्रमाणपुर्जा वितरणलाई निरन्तरता दिइने नापी कार्यालयले जनाएको छ ।
