काठमाडौं । भूमि व्यवस्था, सहकारी, संघीय मामिला तथा सामान्य प्रशासन मन्त्रालयले सिन्धुपाल्चोकको बलेफी गाउँपालिकाका प्रमुख प्रशासकीय अधिकृत होमबहादुर राउतसँग स्पष्टीकरण माग गरेको छ।
गाउँपालिकाको कार्यालयमा सेवा लिन पुगेका एक ज्येष्ठ नागरिकप्रति प्रमुख प्रशासकीय अधिकृत राउतले गरेको व्यवहारका सम्बन्धमा विभिन्न सञ्चारमाध्यम, सामाजिक सञ्जाल तथा नागरिकस्तरबाट मन्त्रालयमा उजुरी तथा गुनासो प्राप्त भएपछि मन्त्रालयले स्पष्टीकरण माग गरेको हो।
मन्त्रालयले राउतलाई पत्र प्राप्त भएको मितिले तीन दिनभित्र मन्त्रालयमा उपस्थित भई लिखित स्पष्टीकरण पेश गर्न निर्देशन दिएको छ। सार्वजनिक पदमा रहेका पदाधिकारी तथा कर्मचारीले सेवाग्राहीप्रति सम्मानजनक, मर्यादित र उचित व्यवहार गर्नुपर्ने मन्त्रालयले स्पष्ट पारेको छ।
ज्येष्ठ नागरिकसमेत रहेका सेवाग्राहीप्रति सम्मानजनक व्यवहार हुन नसकेको विषयमा मन्त्रालयले गम्भीर चासो देखाउँदै त्यसको कारणसमेत लिखित रूपमा खुलाउन भनेको छ। मन्त्रालयले मागेको स्पष्टीकरणपछि घटनाको वास्तविकता र जिम्मेवारीबारे थप प्रक्रिया अघि बढ्ने जनाइएको छ।
