काठमाडौं । प्रतिनिधिसभाको आजको शून्य समयमा सांसद डा. गंगा लक्ष्मी अवालले भक्तपुरस्थित सुधारगृहमा भएको जघन्य हत्या घटनाप्रति सरकारको गम्भीर ध्यानाकर्षण गराउनुभएको छ। उहाँले सुधारगृहजस्तो संवेदनशील स्थानमा भएको घटनाले त्यहाँको सुरक्षा तथा व्यवस्थापन प्रणालीमाथि गम्भीर प्रश्न उठाएको भन्दै घटनाको निष्पक्ष छानबिन गरी दोषीमाथि कडा कारबाही गर्न सरकारसँग माग गर्नुभयो।
सांसद अवालले सुधारगृहमा रहेका व्यक्तिहरूको सुरक्षा र मानवअधिकार सुनिश्चित गर्नु राज्यको दायित्व भएको बताउँदै यस्ता घटनालाई सामान्य रूपमा लिन नहुने धारणा राख्नुभयो। उहाँले घटनाको वास्तविक कारण पहिचान गरी दोषीलाई कानुनी दायरामा ल्याउन तथा पीडित पक्षलाई न्यायको अनुभूति हुने गरी आवश्यक प्रक्रिया अघि बढाउन सरकारको ध्यानाकर्षण गराउनुभयो।
उहाँले देशभर सञ्चालनमा रहेका सुधारगृहहरूको प्रभावकारी अनुगमन र व्यवस्थापन प्रणालीलाई थप सुदृढ बनाउनुपर्नेमा समेत जोड दिनुभयो। सुधारगृहभित्र हुने हिंसा तथा अप्रिय घटना रोक्न नियमित अनुगमन, पर्याप्त सुरक्षा व्यवस्था र जिम्मेवार निकायको प्रभावकारी उपस्थितिसहित आवश्यक कदम चाल्न उहाँले सरकारसँग आग्रह गर्नुभयो।
शून्य समयमा सांसद अवालले विद्युत् उपभोक्तासँग सम्बन्धित समस्याको दीर्घकालीन समाधानका लागि स्पष्ट र प्रभावकारी नीति आवश्यक रहेको विषय पनि उठाउनुभयो। स्वदेशमै उत्पादन भइरहेको विद्युत्को अधिकतम उपयोग बढाउन उपभोक्तामैत्री नीति ल्याउनुपर्ने भन्दै उहाँले विद्युत् खपतलाई प्रोत्साहन गर्ने वातावरण निर्माण गर्न सरकारको ध्यानाकर्षण गराउनुभयो।
विशेषगरी विद्युतीय चुलोलगायत विद्युत् प्रयोग गर्ने उपकरणमा लगाइएको मूल्य अभिवृद्धि कर (VAT) हटाउनुपर्ने माग गर्दै सांसद अवालले विद्युतीय उपकरणको प्रयोगलाई सहज र सुलभ बनाउनुपर्ने बताउनुभयो। स्वदेशमा उत्पादित विद्युत्को खपत बढाउन तत्कालीन तथा दीर्घकालीन रणनीति निर्माण गरी कार्यान्वयन गर्न सके ऊर्जा क्षेत्रमा आत्मनिर्भरता र विद्युत् उपयोग दुवैलाई प्रभावकारी रूपमा अघि बढाउन सकिने उहाँको धारणा थियो।
