चितवन । जिल्ला अदालतबाट फैसला भई लामो समयदेखि फरार रहेका ५८० जनालाई प्रहरीले पक्राउ गरेको छ। जिल्ला प्रहरी कार्यालय चितवनले विभिन्न स्थानमा सञ्चालन गरेको विशेष अभियानमार्फत उनीहरुलाई नियन्त्रणमा लिएको हो।
प्रहरीका अनुसार पक्राउ परेकामध्ये १०१ वर्ष १० महिना १९ दिन बराबरको कैद भुक्तान गराइएको छ भने पाँच करोड ३६ लाख ५४ हजार १७ रुपैयाँ जरिवाना असुल गरिएको छ। जिल्ला प्रहरी कार्यालयका सूचना अधिकारी तथा प्रहरी नायब उपरीक्षक रविन्द्र खनालले फैसला कार्यान्वयनलाई प्रभावकारी बनाउन सादा पोसाक र बर्दी दुवैमा प्रहरी परिचालन गरिएको जानकारी दिए।
उनका अनुसार फैसला कार्यान्वयनका लागि प्रहरी मात्र नभई सम्बन्धित सबै निकायबीच समन्वय आवश्यक हुन्छ। “फैसला कार्यान्वयनलाई प्राथमिकतामा राख्दै निरन्तर अभियान सञ्चालन गरिरहेका छौँ,” खनालले भने।
गत आर्थिक वर्षमा पनि यस्तै अभियानमार्फत ५८३ जना पक्राउ परेका थिए। उनीहरुबाट १२७ वर्ष ६ महिना ३ दिन कैद भुक्तान गराउनुका साथै दुई करोड ५८ लाख ७९ हजार ४१९ रुपैयाँ जरिवाना असुल गरिएको थियो।
प्रहरीले फैसला कार्यान्वयनका क्रममा जिल्ला बाहिर लुकीछिपी बसेका र कैद तथा जरिवाना भुक्तान गर्नुपर्ने व्यक्तिहरुलाई समेत पक्राउ गर्दै आएको जनाएको छ। यसैबीच, चालु आर्थिक वर्षमा ५३ जना सवारी चालक लागुऔषध सेवन गरेर सवारी चलाएको अवस्थामा फेला परेको प्रहरीको भनाइ छ।
