काठमाडौं — जेन्जी २.० ले गृह मन्त्री सुदन गुरुङको राजिनामा माग गरिँदै आएको विषयप्रति कडा आपत्ति जनाउँदै तत्काल राजिनामा दिनुपर्ने कुनै सैधान्तिक आधार नरहेको स्पष्ट पारेको छ।
प्रबक्ता अविन लिम्बुले जारी गरेको प्रेस विज्ञप्तिमा “के अब शेयर किन्नु नै अपराध हो?” भन्ने प्रश्न उठाउँदै आर्थिक गतिविधिमा संलग्न भएको आधारमा कसैलाई दोषी देखाउने प्रयास खतरनाक प्रवृत्ति भएको उल्लेख गरिएको छ। यस्तो अभ्यासले केवल व्यक्तिविरुद्ध अभियान मात्र नभई राज्य प्रणालीलाई नै कमजोर बनाउने दाबी गरिएको छ।
विज्ञप्तिमा नेपालमा विधिको शासन कायम रहनुपर्ने र कुनै पनि पदाधिकारीलाई राजनीतिक दबाब वा स्वार्थका आधारमा हटाउने प्रवृत्ति अस्वीकार्य हुने जनाइएको छ। लिम्बु ले जवाफदेहिता आवश्यक भए पनि त्यो स्थापित कानुनी प्रक्रिया भित्रै हुनुपर्नेमा जोड दिएको छ।
यसैबीच, केही प्रमुख राजनीतिक दलहरू—एमाले, काङ्ग्रेस तथा नेकपा—यस विषयमा आवज उठाएको प्रति पनि प्रश्न उठाइएको छ। लिम्बुले सरकार ठूला बिचौलिया र अनियमिततामा संलग्न शक्तिहरूमाथि कडा कदम चाल्ने तयारीमा रहेको दाबी गर्दै त्यसलाई अवरुद्ध गर्न र सरकारलाई असफल देखाउन विभिन्न राजनीतिक रणनीतिहरू अघि सारिएको आरोप लगाएको छ।
विज्ञप्तिमा केही जेन्जी स्वार्थी समूहहरूलाई समेत प्रयोग गरी भ्रम सिर्जना गर्ने प्रयास भइरहेको उल्लेख गर्दै यसले युवा शक्तिको दुरुपयोग गर्नुका साथै लोकतान्त्रिक संस्कारमा असर पर्ने जनाएको छ।
जेन्जी २.० का प्रबक्ता लिम्बुले गृह मन्त्री गुरुङको राजिनामा मागको विरोध गर्दै विधिको शासन, संस्थागत स्थायित्व र जिम्मेवार शासन प्रणालीको पक्षमा आफूहरू दृढ रहेको जनाएको छन। साथै, देशलाई अस्थिर बनाउने गतिविधि भन्दा सुदृढ बनाउने दिशामा अघि बढ्न सबै पक्षलाई आग्रह गरेको छ।
