काठमाडौँ । गृह मन्त्री सुदन गुरुङले पदबाट राजीनामा दिएका छन्। उनले बुधबार एक सार्वजनिक वक्तव्यमार्फत आफूले मिति २०८२ चैत १३ गतेदेखि इमानदारीपूर्वक जिम्मेवारी सम्हाल्दै आएको उल्लेख गर्दै पछिल्ला दिनहरूमा उठेका विभिन्न प्रश्न, टिप्पणी र जनचासोलाई गम्भीर रूपमा लिएको बताएका छन्।
गुरुङले आफ्नो लागि पदभन्दा नैतिकता र जनविश्वास ठूलो भएको उल्लेख गर्दै सार्वजनिक जीवन स्वच्छ, पारदर्शी र उत्तरदायी हुनुपर्ने बताएका छन्। उनले हाल देशमा उठिरहेको ‘Gen Z’ आन्दोलनले पनि सुशासन र जवाफदेहिताको मागलाई बलियो बनाएको बताएका छन्।
आफूसँग सम्बन्धित विषयमा निष्पक्ष छानबिन होस् र पदमा रहँदा कुनै ‘कन्फ्लिक्ट अफ इन्टरेस्ट’ नदेखियोस् भन्ने उद्देश्यले तत्काल प्रभावबाट राजीनामा दिएको उनले स्पष्ट पारे। “मैले आफ्नो तर्फबाट नैतिक जिम्मेवारी निर्वाह गरेको छु,” वक्तव्यमा भनिएको छ।
साथै, उनले सञ्चारकर्मी, आम नागरिक तथा युवाहरूलाई सत्य, इमानदारी र आत्मशुद्धिको बाटोमा अघि बढ्न आग्रह गरेका छन्। केही सञ्चारकर्मीहरूको शेयर स्वार्थबारे पनि क्रमशः खुल्ने संकेत गर्दै उनले परिवर्तनका लागि नैतिक साहस आवश्यक हुने बताएका छन्।
