काठमाडौं । चन्द्रागिरी नगरपालिका–२ नागढुङ्गास्थित वडा कार्यालयमा जनप्रतिनिधि तथा कर्मचारी समयमै उपस्थित नभएपछि सेवा लिन पुगेका सेवाग्राही निराश भएका छन्। बिहानैदेखि विभिन्न कामका लागि पुगेका स्थानीयले कार्यालयमा जिम्मेवार व्यक्तिको अभाव देखेपछि असन्तुष्टि जनाएका हुन्।
स्थानीयका अनुसार बिहान ९ बजेदेखि नै नागरिकहरू कर तिर्न र अन्य प्रशासनिक कामका लागि वडा कार्यालय पुगेका थिए। तर कार्यालयमा कर्मचारी तथा जनप्रतिनिधि कोही पनि उपस्थित नभेटिँदा सेवाग्राहीहरू खाली कुर्सी हेर्दै फर्किन बाध्य भएका थिए।
“हामी कर तिर्न आएका थियौं, तर न जनप्रतिनिधि छन् न कर्मचारी। यस्तो अवस्थामा सेवा नपाउँदा निकै हैरानी भएको छ,” एक सेवाग्राहीले गुनासो गरे। उनीजस्तै अन्य सेवाग्राहीहरूले पनि समयमै सेवा नपाउँदा आक्रोश व्यक्त गरेका थिए।
वडा कार्यालयमा नियमित सेवा प्रवाह हुन नसक्दा स्थानीयले जनप्रतिनिधि र कर्मचारीप्रति गम्भीर प्रश्न उठाएका छन्। सरकारी कार्यालयमै यस्तो लापरबाही देखिनु जिम्मेवारीप्रतिको बेवास्ता भएको आरोप स्थानीयको छ।
यस घटनाले स्थानीय तहको सेवा प्रवाह प्रणालीमाथि पुनः प्रश्न खडा गरेको छ। स्थानीय बासिन्दाले यस्ता समस्या दोहोरिन नदिन सम्बन्धित निकायको ध्यानाकर्षण गराउँदै नियमित, जिम्मेवार र प्रभावकारी सेवा सुनिश्चित गर्न माग गरेका छन्।
