काठमाडौं । आसन्न प्रतिनिधिसभा सदस्य निर्वाचनलाई लक्षित गर्दै सामाजिक सञ्जालमार्फत भ्रामक सामग्री फैलाएको आरोपमा प्रहरीले एक जनालाई पक्राउ गरेको छ। पक्राउ पर्नेमा सुनसरीको इनरुवा नगरपालिका निवासी २७ वर्षीय रामचन्द्र ठाकुर रहेका छन्।
जिल्ला प्रहरी कार्यालय सुनसरीले साइबर ब्युरोको प्राविधिक सहयोगमा ठाकुरलाई सोमबार नियन्त्रणमा लिएको हो। प्रहरीका अनुसार उनले आफ्नो व्यक्तिगत फेसबुक आईडी प्रयोग गरी झापा निर्वाचन क्षेत्र नम्बर ५ मा उम्मेदवार रहेका बालेन्द्र शाह (बालेन) लाई भारतीय प्रधानमन्त्री नरेन्द्र मोदी ले जितको शुभकामना दिएको दाबी गर्दै एक भिडियो पोस्ट गरेका थिए। उक्त पोस्टमा “भारतीय प्रधानमन्त्री नरेन्द्र मोदीले बालेन शाहलाई जितको शुभकामना दिए” भन्ने आशयको सन्देश राखिएको थियो।
‘टेकपाना’को फ्याक्टचेक डेस्कले उक्त भिडियोको परीक्षण गर्दा एआई प्रविधि प्रयोग गरी बनाइएको डिपफेक सामग्री भएको पुष्टि गरेको थियो। त्यसपछि प्रहरी सक्रिय भई अनुसन्धान अघि बढाएको जनाएको छ।
प्रहरीका अनुसार पक्राउ परेका ठाकुरमाथि साइबर अपराधसम्बन्धी कसुरमा थप अनुसन्धान भइरहेको छ। पछिल्लो समय एआई प्रविधिको दुरुपयोग गरी चर्चित व्यक्तिका नक्कली भिडियो (डिपफेक) तयार पारेर अफवाह फैलाउने क्रम बढ्दै गएको भन्दै प्रहरीले यस्ता गतिविधिमाथि कडाइ गर्ने जनाएको छ।
निर्वाचन नजिकिँदै गर्दा सामाजिक सञ्जालमा भ्रम फैलाउने र मतदातालाई प्रभावित पार्ने प्रयास बढेको भन्दै सुरक्षा निकायले निगरानी तीव्र पारेको जनाएको छ।
