काठमाडौं- जनता समाजवादी पार्टी (जसपा)को प्रदेश २ को संसदीय दलको नेतामा मुख्यमन्त्री लालबाबु राउत चयन भएका छन्। जसपा बाबुराम भट्टराई-उपेन्द्र यादवपक्षका मुख्यमन्त्री राउतलाई दलको नेता चयन गरिएको एक प्रदेश सभा सांसदले बताए।
प्रदेश २ मा जसपा संसदीय दलको विधान नभएकाले फरक-फरक दलको रुपमा अभ्यास भइरहेको थियो। पार्टीमा एक मत हुन नसक्दा दलको नेता यथावत राखिएको थियो।
जसपामा महन्थ ठाकुर-राजेन्द्र महतो र बाबुराम-उपेन्द्रपक्ष गरी दुई चिरामा विभाजित भएपछि बाबुराम-उपेन्द्रपक्षले एकतर्फी रुपमा दलको नेतामा राउतलाई बनाएको हो।
बाबुराम-उपेन्द्रपक्षका बहुमत सांसदले राउतलाई दलको नेता घोषणा गरिएको एक प्रदेश सांसदले बताए। दलको नेता राउतलाई बनाउने निर्णय भए पनि बाहिर सार्वजनिक नगरिएको ती सांसदले बताए। तर, मुख्यमन्त्री राउतलाई नेपाल लाइभकर्मीले फोन सम्पर्क गर्दा समाचार लेख्ने बेला भइनसकेको बताउँदै छलफल जारी रहेको प्रतिक्रिया दिए।
प्रदेश २ मा १०४ प्रदेश सभा सदस्यमध्ये जसपाका ५५ जना छन्। जसमध्ये ३० जना तत्कालीन समाजवादी र २५ जना राष्ट्रिय जनता पार्टीपक्षका छन्। पछिल्लो समय तत्कालीन समाजवादीपक्षमा ३५ जना पुगेको बाबुराम-उपेन्द्रपक्षका एक नेताले बताए।
