जेठ ११, काठमाडौं । प्रधानमन्त्री केपी ओलीबिरुद्ध वरिष्ठ अधिवक्ता दीनेश त्रिपाठीले सर्वोच्च अदालतमा रिट दायर गरेका छन् । पुनःस्थापित प्रतिनिधिसभा विघटन गरेको भन्दै कारबाहीको माग गर्दै रिट दायर गरेका हुन् । प्रधानमन्त्री ओलीले पुनः प्रतिनिधी सभा विघटन गरेर अदालतको अपहेलना गरेको गम्भीर आरोप उल्लेख छ ।
यस्तै अदालतको अवहेलना गरेकोले प्रधानमन्त्रीलाई २४ घण्टाभित्र अदालतमा उपस्थित गराउन आग्रह गरिएको छ । अदालतको अवहेलनामा अधिकतम १ वर्ष कैद साथै दश हजार जरिबाना गरी पाउ भन्ने माग सहितको निवेदन अधिवक्ता त्रिपाठीले आज सर्वोच्चमा पेश गरेका छन् ।
‘अदालतले गरेको प्रतिनिधि सभाको पुनर्बहालीलाई जसरी पनि असफल गराउने बदनियत सुरुदेखि नै राखेको देखिन्छ । त्यसैले निजले प्रतिनधि सभालाई कुनै पनि मौका नदिएर हठात संसदको अधिवेशनलाई अन्त्य गर्नुभयो,’ रिटमा भनिएको छ ।
