जेठ ९,भक्तपुर– नेपाली कांग्रेस भक्तपुरले बर्तमान के.पी.ओलीको सरकार राज्य सत्ताकब्जाको नियतले अघि बढेको आरोप लगाएको छ ।नेपाली कांग्रेस जिल्ला कार्यसमिति भक्तपुरले आज एक विज्ञप्ती जारी गर्दै बर्तमान ओलीको सरकार गठन भएको सुरु दिनदेखि नै नेपालको संबिधान, लोकतान्त्रिक बिधि पद्धती तथा संसदीय मूल्य र मान्यता बिपरीत निरकुंश ढंगबाट राज्य सत्ताकब्जाको नियतले आफ्ना गतिबिधिहरु अगाडि बढाई रहेको रहेको जनाएको छ ।
पार्टी जिल्ला उपसभापति हरि प्रसाद नेपालले जारी गरेको विज्ञप्तीमा ‘बिश्वासको मत लिन सक्दिन भनी नयाँ सरकार गठनका लागि राष्ट्रपति कार्यालयमा सिफारिस गर्ने प्रधानमन्त्रीको कठपुतलीका रुपमा २१ घण्टाको छोटो सूचना दिनु, सूचना बमोजिम १४९ जना सभासदको हस्ताक्षर सहित माग गर्दा पुनः बिभिन्न बहानामा के.पी. ओलीलाई नै प्रधानमन्त्रीका रुपमा नियुक्त गरी मध्यरातमा संसद बिघटन गर्ने कार्यले बर्तमान सरकार अधिनायकबाद र निरंकुशताका साथ अघि बढेको प्रष्ट हुदाँहुदै संबिधान बमोजिम संबिधानको संरक्षक र पालकको रुपमा रहनु पर्ने राष्ट्रपति बर्तमान अवस्थामा संबिधान बिपरितका सवै कार्यलाई मलजल गर्ने मतियारका रुपमा देखिनु भनेको सर्वसत्ताबादको द्योतक रहेको प्रष्ट हुन्छ ।।’ उल्लेख गरिएको छ ।
राष्ट्रपति कसैको र कुनै दलको हुनु हुदैन भन्ने सर्वब्यापी मान्यता बिपरित राष्ट्रपति बिद्यादेवी भण्डारीको भूमिकाप्रति नेपाली कांग्रेस जिल्ला कार्य समिति भक्तपुरले घोर भत्र्सना गरेको छ ।
‘राष्ट्रपति कार्यालयबाट सूचना प्रकाशित भै सकेको सन्दर्भमा प्रतिनिधि सभामा कायम १४९ जना माननीय सदस्यहरुले नेपाली काँग्रेस संसदीय दलका नेता श्री शेरबहादुर देउवालाई प्रधानमन्त्रीको पदमा नियुक्तिको लागि प्रस्ताव सहित माग गरिएकोमा राष्ट्रपति कार्यालयबाट १४९ जना माननीय सभासदको माग बमोजिम श्री शेरबहादुर देउवालाई प्रधानमन्त्री नियुक्त गर्नु पर्नेमा जालझेल पुर्णरुपमा बिश्वासको मत लिन सक्दीन भनी अर्को सरकार गठनका लागि माग गर्ने के.पी. ओलीलाई नै मध्य रातमा प्रधानमन्त्री नियुक्त गरी हठात प्रतिनिधि सभा बिघटन गर्ने कार्य राष्ट्रपति कार्यालयबाट हुनु भनेको संबिधान, बिधि परम्पराको खिल्ली उढाउने मात्रै होईन राष्ट्रपतिको निष्पक्षता प्रति हाम्रो गम्भिर असहमती रहेको छ । राष्ट्रपति कसैको र कुनै दलको हुनु हुदैन भन्ने सर्वब्यापी मान्यता बिपरित राष्ट्रपति बिद्यादेवी भण्डारीको भूमिका केवल वर्तमान प्रधानमन्त्री के पी ओली र उहाँको राजनैतिक दलको संरक्षण गर्नु र गलत क्रियाकलापको साक्षी बस्नु मात्रै भएको देखिएकोले राष्ट्रपतिको कार्यालयबाट भएका संबिधान बिपरीतका कार्यहरुको नेपाली कांग्रेस जिल्ला कार्य समिति भक्तपुर घोर भत्र्सना गर्दछ ।’ विज्ञप्तीमा उल्लेख गरिएको छ ।
राष्ट्रपतिको असंबैधानिक स्वेच्छाचारी तथा अधिनायकबादी प्रबृतिको बिरुद्द एकजुट भै सशक्त प्रतिकार गर्न भक्तपुर कांग्रेसले आम भक्तपुर बासी दिदीबहिनी दाजुभाईहरुमा आग्रह समेत गरेको छ ।
