दाङ, १९ वैशाख ।
उपनिर्वाचन हुँदा तत्कालीन नेपाल कम्युनिष्ट पार्टीबाट चुनाव जितेकी लुम्बिनी प्रदेश सभा सदस्य विमला वलीले आजभन्दा २६ दिन अघि नै नेकपा एमाले परित्याग गरेको खुलाशा भएको छ ।
उनले एमाले परित्याग गर्दै माओवादी केन्द्रमा प्रवेश गर्न चाहेको पत्र २६ दिन अघि अर्थात गत चैत्र २५ गते नै माओवादी केन्द्रका सचेतक कुल प्रसाद केसी सोनामलाई बुझाएको पाइएको हो । केसीले प्रमुख सचेतकलाई आवश्यक कारबाहीका लागि भन्दै वैशाख १७ मा मात्रै निर्देशन दिएका छन् ।
तत्कालीन एमाले र माओवादी केन्द्रबीच भएको एकतालाई सर्वोच्च अदालतले खारेज गरिदिएपछि निर्वाचन आयोगले उपनिर्वाचनबाट चुनाव जितेका जनप्रतिनिधिले दल रोज्न पाउने व्यवस्था गरिदिएको थियो ।
२०७६ मंसिरमा भएको चुनावमा वलीले दाङ ३ (ख)बाट चुनाव जितेकी थिइन् । उक्त क्षेत्रमा सांसद रहेका उनका श्रीमान् उत्तरकुमार वलीको सवारी दुर्घटनामा मृत्यु भएपछि उपचुनाव भएको थियो । उत्तरकुमार नेकपा एमालेका उम्मेदवार थिए ।
वलीले माओवादी केन्द्र रोजेसँगै आजै पदबाट राजीनामा दिएका मुख्यमन्त्री शंकर पोखरेलको योजनाअनुसार उनी एक दलको बहुमतका आधारमा मुख्यमन्त्री बन्ने सम्भावना टरेको छ ।
६ जना सांसद कारबाहीमा परेपछि लुम्बिनी प्रदेश सभामा ८१ जना सदस्य छन् । तीमध्ये ४१ जना एमालेका सांसद भएकाले मुख्यमन्त्री पोखरेलले संविधानको धारा १६८ (१) अनुसार बहुमतको सरकार बनाउने बताएका थिए ।
वलीले माओवादी रोजेसँगै प्रदेश सभामा अब पोखरेलको बहुमत पुग्दैन । आजै उनलाई माओवादी केन्द्रका तर्फबाट प्रदेश सभा सदस्यको रुपमा परिचय पत्र समेत उपलब्ध गराइएको छ ।
त्यस्तै वलिले आजै माओवादी केन्द्रका अध्यक्ष पुष्पकमल दाहाल प्रचण्डलाई समेत संवोधन गरेर पार्टीको सदस्यता उपलब्ध गराइदिन निवेदन दिएकी छिन् । प्रचण्डले लुम्बीनी प्रदेश सभाका संसदीय दलका नेता कुलप्रसाद केसीलाई तुरुन्त माओवादी केन्द्रको तर्फबाट परिचय पत्र उपलब्ध गराउन सिफारिस गरेका छन् ।
