काठमाडौं । नेपालमा ख्रीष्टियन विदेशी नागरिकहरूलाई भिसा तथा अध्यागमनसम्बन्धी कानुन उल्लङ्घन गरेको आरोपमा देश निकाला (डिपोर्ट) गरिएका घटनाबारे अन्तर्राष्ट्रिय चासो र बहस भइरहेका बेला अमेरिकामा हिन्दु समुदायलाई लक्षित गर्दै देश निकाला गर्नुपर्ने नारासहित प्रदर्शन भएको छ। अमेरिकाको सियाटलमा दीपावली उत्सव मनाइरहेका हिन्दु समुदायलाई लक्षित गरी गरिएको उक्त प्रदर्शनले धार्मिक स्वतन्त्रता र सहिष्णुताको विषयलाई पुनः चर्चामा ल्याएको छ।
अमेरिकाको सियाटलमा दीपावली उत्सवका क्रममा दक्षिणपन्थी कार्यकर्ता जेक ल्याङ र थोमस एलेनले हिन्दु समुदायलाई लक्षित गर्दै आपत्तिजनक नारासहितका प्लेकार्ड प्रदर्शन गरेका थिए। उनीहरूले ‘टीका लगाउने सबैलाई देश निकाला गर’ र ‘इसाईहरूको हिन्दु प्रतिस्थापन रोक’ जस्ता नारा लेखिएका प्लेकार्ड बोकेर प्रदर्शन गरेको बताइएको छ।
उक्त घटनाप्रति अमेरिकी सांसद प्रमिला जयपालले कडा आपत्ति जनाएकी छन्। उनले यस्तो प्रदर्शनलाई घृणित तथा जातिवादी गतिविधिको संज्ञा दिँदै कुनै पनि धार्मिक समुदायले आफ्नो आस्था र संस्कृति सुरक्षित रूपमा अभ्यास गर्न तथा चाडपर्व मनाउन पाउनुपर्ने धारणा व्यक्त गरेकी छन्।
त्यस्तै, भारतीय मूलका अमेरिकी व्यापारी अजय जैन भुटोरियाले पनि घटनाको विरोध गरेका छन्। धार्मिक आस्था, पहिचान र सांस्कृतिक पृष्ठभूमिका आधारमा कुनै पनि समुदायलाई निशाना बनाउनु अस्वीकार्य रहेको उनको भनाइ छ।
नेपालमा विदेशी ख्रीष्टियन नागरिकहरूलाई अध्यागमन कानुन उल्लङ्घन गरेको आरोपमा गरिएको कारबाही र धार्मिक स्वतन्त्रतासम्बन्धी बहसका बीच अमेरिकामा हिन्दु समुदायमाथि लक्षित यस्तो प्रदर्शन हुनुले अन्तर्राष्ट्रिय स्तरमै धार्मिक सहिष्णुता र मानवअधिकारको विषयलाई थप महत्त्व दिएको छ।
धार्मिक स्वतन्त्रता कुनै एउटा धर्म वा समुदायका लागि मात्र सीमित विषय होइन। हिन्दु, ख्रीष्टियन, मुस्लिम, बौद्धलगायत सबै धर्मावलम्बीले आफ्नो आस्था, संस्कृति र परम्पराअनुसार सम्मानपूर्वक जीवनयापन गर्न पाउनु मानवअधिकारको आधारभूत मान्यता हो। नेपालमा ख्रीष्टियन समुदायको अधिकारको पक्षमा आवाज उठाउनेहरूले अमेरिकामा हिन्दु समुदायमाथि भएको भनिएको विभेदको पनि समान रूपमा विरोध गर्न आवश्यक छ। त्यसैगरी, कुनै पनि देशमा धार्मिक पहिचानका आधारमा घृणा, विभेद र निष्कासनको मागलाई सामान्य राजनीतिक अभिव्यक्तिका रूपमा लिनु हुँदैन।
