भक्तपुर । उज्यालो नेपाल पार्टीमा भक्तपुरका विभिन्न स्थानीय तहका ६ जना व्यक्ति पार्टी प्रवेश गरेका छन्। शनिबार भक्तपुरमा आयोजित पार्टीको कार्यक्रममा उनीहरूले औपचारिक रूपमा पार्टी प्रवेश गरेका हुन्। पार्टी प्रवेश गर्नेहरू सूर्यविनायक नगरपालिका, चाँगुनारायण नगरपालिका र भक्तपुर नगरपालिकाका रहेका छन्।
पार्टी प्रवेश गर्नेहरूलाई उज्यालो नेपाल पार्टीका केन्द्रीय उपमहासचिव जीतराम लामाले टीका लगाएर स्वागत गरेका थिए। कार्यक्रममा पार्टीका नेता तथा कार्यकर्ताहरूको उपस्थिति रहेको थियो। नवप्रवेशीहरूलाई स्वागत गर्दै लामाले पार्टीमा आबद्ध भएका सदस्यहरूलाई संगठन निर्माण तथा पार्टीको उद्देश्य प्राप्तिका लागि सक्रिय भूमिका निर्वाह गर्न आग्रह गरेका थिए।
पार्टी प्रवेश गर्नेहरूमध्ये सूर्यविनायक नगरपालिकाबाट तीन जना रहेका छन्। सूर्यविनायक नगरपालिका वडा नं. ६ की सोविता गौतम तथा वडा नं. ७ का कुमार लामा र सञ्जीव तामाङ पार्टीमा प्रवेश गरेका हुन्।
त्यसैगरी चाँगुनारायण नगरपालिकाबाट दुई जना पार्टीमा आबद्ध भएका छन्। चाँगुनारायण नगरपालिका वडा नं. ८ का मानबहादुर लामा र वडा नं. ९ का हरिबहादुर गिरीले उज्यालो नेपाल पार्टीको सदस्यता लिएका छन्।
यस्तै, भक्तपुर नगरपालिकाबाट पनि एक जना पार्टी प्रवेश गरेका छन्। भक्तपुर नगरपालिका वडा नं. ४ का रमेश किलम्बूले शनिबार आयोजित कार्यक्रममा पार्टी प्रवेश गरेका हुन्।
भक्तपुरका तीनवटै नगरपालिकाबाट नयाँ सदस्यहरू पार्टीमा आबद्ध हुनुलाई उज्यालो नेपाल पार्टीको स्थानीय संगठन विस्तारका रूपमा हेरिएको छ। पछिल्लो समय विभिन्न राजनीतिक दलहरूले संगठन विस्तार तथा जनस्तरमा आफ्नो उपस्थिति बलियो बनाउने अभियान सञ्चालन गरिरहेका बेला भक्तपुरमा भएको यो पार्टी प्रवेशलाई पनि राजनीतिक रूपमा अर्थपूर्ण मानिएको छ।
