हुम्ला । देशकै विकट जिल्लामध्ये एक हुम्लामा विद्यार्थीले अझै पनि तुइन तरेर विद्यालय जानुपर्ने बाध्यता अन्त्य गर्न श्रम संस्कृति पार्टीका अध्यक्ष तथा माननीय हर्क साम्पाङले फलामे पुल निर्माण गर्ने प्रतिबद्धता व्यक्त गरेका छन्। हुम्ला पुगेका साम्पाङले स्थानीय जनप्रतिनिधि र गाउँलेहरूको अनुरोधपछि विद्यार्थीलाई सुरक्षित रूपमा खोला तर्ने व्यवस्था मिलाउन पुल बनाउने निर्णय गरेको बताएका हुन्।
साम्पाङले आफ्नो फेसबुक स्टाटसमार्फत हुम्लाका बालबालिकाले विद्यालय जान जोखिमपूर्ण यात्रा गर्नुपर्ने अवस्थाको अन्त्य हुनुपर्ने उल्लेख गरेका छन्। उनले विकट क्षेत्रका विद्यार्थीको समस्या समाधान गर्न तत्काल पहल आवश्यक रहेको बताउँदै यस विषयमा आफूले चासो दिएको जानकारी दिएका छन्।
उनका अनुसार हुम्लाको सर्केगाड गाउँपालिका वडा नम्बर २ र ६ का वडाध्यक्षद्वय तथा स्थानीय बासिन्दाको अनुरोधमा रिप्प गाउँछेउ लिप्ने क्षेत्रमा विद्यार्थीको आवतजावत सहज बनाउन फलामे पुल निर्माण गर्ने निर्णय गरिएको हो। पुल निर्माण भएपछि जोखिम मोलेर तुइन तर्नुपर्ने बाध्यता कम हुने र बालबालिकालाई विद्यालय आउजाउ गर्न सहज हुने अपेक्षा गरिएको छ।
साम्पाङले सोही स्थानमा विदेशी दातृसंस्था कादुरीले नोभेम्बर १४ अर्थात् कात्तिक २८ गतेदेखि झोलुङ्गे पुल निर्माणको काम सुरु गर्ने जानकारी प्राप्त भएको पनि आफ्नो फेसबुक स्टाटसमा उल्लेख गरेका छन्। यसले स्थानीय पूर्वाधार विकासमा सहयोग पुग्ने अपेक्षा गरिएको छ। यद्यपि, फलामे पुल निर्माणको विस्तृत योजना, लागत र निर्माण सम्पन्न हुने समयबारे उनले थप विवरण सार्वजनिक गरेका छैनन्।
यसअघि दार्चुला, खाेटाङ लगायतका क्षेत्रमा श्रमदानमार्फत झोलुङ्गे साथै पक्कि पुलहरु निर्माणमा सक्रिय रहँदै आएका साम्पाङले हुम्लामा पनि स्थानीय आवश्यकताअनुसार काम अघि बढाउने प्रतिबद्धता जनाएका हुन्। विकट भूगोलका कारण आधारभूत सेवा र पूर्वाधारबाट वञ्चित नागरिकका समस्या समाधान गर्न सरकारी निकायसँगै स्थानीय समुदाय र श्रमदाताहरूको पहल महत्त्वपूर्ण हुने देखिन्छ। हुम्लाका विद्यार्थीले सुरक्षित रूपमा विद्यालय जान पाउने अवस्था निर्माण हुनु यस पहलको प्रमुख अपेक्षा हो।
