काठमाडौँ । नेपाली कांग्रेसको १५औँ महाधिवेशनबाट निर्वाचित पदाधिकारी तथा केन्द्रीय सदस्यहरूलाई आज पद तथा गोपनीयताको शपथ ग्रहण गराउने र निर्वाचित भएको प्रमाणपत्र वितरण गर्ने तयारी गरिएको छ।
महाधिवेशनबाट सभापतिमा निर्वाचित गगन थापाले गत असोज ३१ गते नै पद तथा गोपनीयताको शपथ लिइसकेका छन्। तर, सभापति थापाबाहेक अन्य पदाधिकारी तथा केन्द्रीय सदस्यहरूले भने अहिलेसम्म शपथ ग्रहण गरेका छैनन्। उनीहरूले निर्वाचित भएको प्रमाणपत्रसमेत प्राप्त गरेका छैनन्।
गत असोज १८ देखि २३ गतेसम्म सम्पन्न कांग्रेसको १५औँ महाधिवेशनले २३१ सदस्यीय केन्द्रीय समिति चयन गरेको थियो। उक्त समितिमा सभापति थापासहित निर्वाचित तथा निर्विरोध भएका सदस्यहरू समावेश छन्। सभापतिबाहेकका २३० पदाधिकारी तथा सदस्यको शपथ ग्रहण र प्रमाणपत्र वितरण कार्यक्रम हुन बाँकी छ।
कांग्रेसको निर्वाचन समितिका सदस्यसचिव अधिवक्ता राजु कटुवालका अनुसार सभापतिबाहेकका पदाधिकारी तथा केन्द्रीय सदस्यहरूलाई आज दिउँसो २ बजे शपथ ग्रहण गराउने र प्रमाणपत्र वितरण गर्ने तयारी भइरहेको छ।
निर्धारित कार्यक्रम सम्पन्न भएसँगै महाधिवेशनबाट निर्वाचित कांग्रेसका बाँकी पदाधिकारी तथा केन्द्रीय सदस्यहरूले औपचारिक रूपमा पद तथा गोपनीयताको शपथ लिनेछन्।
