काठमाडौँ । एनएमबि बैंक लिमिटेडले अन्तर्राष्ट्रिय रकम स्थानान्तरण सेवालाई थप सहज, सुरक्षित र प्रभावकारी बनाउने उद्देश्यले विश्वप्रसिद्ध डिजिटल भुक्तानी संस्था भिजासँग साझेदारी गरेको छ। बैंकले आफ्नो अन्तर्राष्ट्रिय भुक्तानी प्रणाली विस्तार गर्ने क्रममा ‘भिजा डाइरेक्ट टु एकाउन्ट’ सेवा सञ्चालनका लागि सम्झौता गरेको हो।
सम्झौतासँगै एनएमबि बैंकका ग्राहकले विश्वका विभिन्न मुलुकमा रकम पठाउन थप सहज र भरपर्दो डिजिटल माध्यम प्राप्त गर्ने भएका छन्। बैंकका अनुसार यस सेवामार्फत ग्राहकले झन्झटिलो प्रक्रियाबिना छिटो, सुरक्षित र सहज रूपमा सीमापार रकम स्थानान्तरण गर्न सक्नेछन्। प्रयोगकर्तामैत्री प्रविधिमा आधारित यो सेवाले अन्तर्राष्ट्रिय कारोबारलाई सरल बनाउनुका साथै ग्राहकको समय र प्रक्रियागत झन्झटसमेत घटाउने अपेक्षा गरिएको छ।
भिजाको ‘डाइरेक्ट टु एकाउन्ट’ प्रविधि विश्वका १९५ भन्दा बढी देश तथा क्षेत्रमा सञ्चालनमा रहेको अन्तर्राष्ट्रिय भुक्तानी प्रणाली हो। यस प्रविधिमार्फत रकमलाई सोझै सम्बन्धित बैंक खातामा पठाउन सकिने व्यवस्था रहेको छ। एनएमबि बैंक र भिजाबीचको सहकार्यले अन्तर्राष्ट्रिय रकम स्थानान्तरणलाई थप विश्वसनीय, सुरक्षित र प्रभावकारी बनाउन योगदान पुर्याउने बैंकको विश्वास छ।
डिजिटल वित्तीय सेवामा नवीन प्रविधि भित्र्याउँदै आएको एनएमबि बैंकले ग्राहकलाई आधुनिक, सहज र गुणस्तरीय बैंकिङ सेवा उपलब्ध गराउने लक्ष्यसहित आफ्नो सेवा विस्तार गर्दै आएको छ। बैंकले हाल देशभर रहेका १९७ शाखा, १७६ एटीएम तथा नौवटा एक्स्टेन्सन काउन्टरमार्फत बैंकिङ सेवा प्रदान गरिरहेको छ।
यस साझेदारीलाई बैंकको डिजिटल बैंकिङ विस्तार तथा अन्तर्राष्ट्रिय भुक्तानी सेवालाई थप प्रतिस्पर्धी बनाउने प्रयासका रूपमा हेरिएको छ।
