काठमाडौं । प्रधानमन्त्री बालेन्द्र शाह नेतृत्वको सात सदस्यीय नेपाली प्रतिनिधिमण्डल संयुक्त राष्ट्रसंघको ८१औँ महासभामा सहभागी हुन मंगलबार अमेरिका प्रस्थान गरेको छ।
प्रधानमन्त्री शाहसहितको टोली त्रिभुवन अन्तर्राष्ट्रिय विमानस्थलबाट कतार एयरवेजको क्यूआर ६४५ उडानमार्फत दोहा हुँदै अमेरिकाको न्यूयोर्कतर्फ प्रस्थान गरेको हो। टोलीलाई विमानस्थलमा गृहमन्त्री सुधन गुरुङ र पर्यटनमन्त्री खडकराज पौडेलले बिदाइ गरेका थिए।
प्रधानमन्त्रीसँगै प्रमुख सल्लाहकार कुमार व्यञ्जनकार, शिष्टाचार महापाल कुमार खरेल, निजी फोटोग्राफर विनय शाक्य, शिष्टाचार अधिकृत महेश यादव, अंगरक्षक लेफ्टिनेन्ट कर्णेल बालमुकुन्द विष्ट र डीएसपी दीपेश बस्याल अमेरिका गएका छन्।
संयुक्त राष्ट्रसंघको महासभामा प्रधानमन्त्री शाहले नेपालको प्रतिनिधित्व गर्दै विभिन्न अन्तर्राष्ट्रिय मञ्चमा सम्बोधन तथा उच्चस्तरीय भेटवार्ता गर्ने कार्यक्रम रहेको छ। महासभाका क्रममा नेपालका प्राथमिकता, समसामयिक अन्तर्राष्ट्रिय विषय तथा द्विपक्षीय सम्बन्धका विषयमा छलफल हुने अपेक्षा गरिएको छ।
प्रधानमन्त्रीसँगै गएको टोलीबाहेक परराष्ट्रमन्त्री, परराष्ट्र सचिव र सहसचिवसहितको नेपाली प्रतिनिधिमण्डल भने यसअघि नै अमेरिका प्रस्थान गरिसकेको छ। उनीहरू संयुक्त राष्ट्रसंघको ८१औँ महासभासम्बन्धी कार्यक्रमको तयारी तथा समन्वयमा सहभागी भइरहेका छन्।
