काठमाडौं । नेकपा (एमाले) को केन्द्रीय कमिटी बैठकमा आज अध्यक्ष केपी शर्मा ओलीले प्रस्तुत गरेको राजनीतिक प्रतिवेदनमाथि छलफल हुँदैछ। ललितपुरमा सोमबारदेखि सुरु भएको एमालेको तेस्रो केन्द्रीय कमिटी बैठकमा अध्यक्ष ओलीले राजनीतिक प्रतिवेदन पेस गरेका थिए।
बैठक आज बिहान ९ बजेबाट सुरु हुने जनाइएको छ। बैठकमा केन्द्रीय कमिटीका सदस्यहरूले अध्यक्ष ओलीको प्रतिवेदनमाथि धारणा राख्नेछन्। प्रत्येक सदस्यलाई आफ्नो धारणा राख्न तीन मिनेटको समय निर्धारण गरिएको छ।
बैठकमा उपाध्यक्षद्वय विष्णुप्रसाद पौडेल र गोकर्ण विष्ट तथा महासचिव शंकर पोखरेललाई माइन्युट लेखनको जिम्मेवारी दिइएको छ। त्यस्तै, उपमहासचिव योगेश भट्टराई, सचिव पद्मा अर्याल तथा केन्द्रीय सदस्यहरू सूर्य थापा, निरज आचार्य र खिमलाल भट्टराईलाई बहस नोट तयार गर्ने जिम्मेवारी दिइएको छ।
बैठकलाई मर्यादित र व्यवस्थित बनाउन अध्यक्ष ओलीले बैठक हलमा मोबाइल फोन लैजान तथा छलफल रेकर्ड गर्न प्रतिबन्ध लगाएका छन्। बैठकमा बोल्न, हलभित्र तथा बाहिर जान र विशेष परिस्थितिमा विषय प्रस्तुत गर्न अध्यक्षको अनुमति लिनुपर्ने व्यवस्था गरिएको छ। बैठकमा उठेका विषय तथा छलफलका मुख्य बुँदा सदस्यहरूले डायरीमा मात्र टिपोट गर्नुपर्ने निर्देशनसमेत दिइएको छ।
एमालेले बैठकका लागि नौवटा एजेन्डा तय गरेको छ। जसमा अध्यक्षको राजनीतिक प्रतिवेदनमाथि छलफल तथा पारित, केन्द्रीय कमिटीमा मनोनयन, विभाग गठन, पोलिटब्युरो गठन, स्थायी समिति गठन, सल्लाहकार परिषद् गठन, ज्येष्ठ कम्युनिस्ट मञ्च गठन, अनुशासन आयोग गठन तथा समसामयिक प्रस्तावमाथि छलफल रहेका छन्।
