काठमाडौं । संविधान दिवस तथा राष्ट्रिय दिवस, २०८३ को मूल समारोहलाई सम्बोधन गर्दै प्रधानमन्त्री वालेन्द्र शाहले संविधानको अक्षर र भावनाप्रति सरकार पूर्णरूपमा प्रतिबद्ध रहेको बताएका छन्। उनले राजनीतिक व्यवस्था परिवर्तन तथा सुशासनका लागि भएका आन्दोलनमा ज्यान गुमाउने शहीदहरू र ऐतिहासिक जेनजी आन्दोलनमा सहादत प्राप्त गर्नेहरूप्रति श्रद्धाञ्जली अर्पण गर्दै हालैको रसुवा–भोटेकोशी बाढीमा मृत्यु भएका स्वदेशी तथा विदेशी नागरिकप्रति पनि श्रद्धाञ्जली व्यक्त गरे।
प्रधानमन्त्री शाहले संविधानले विविधताबीचको एकता, विभेद र असमानताको अन्त्य तथा विकास, समृद्धि र सामाजिक न्यायमा आधारित समतामूलक समाज निर्माणको वाचा गरेको उल्लेख गरे। प्रतिस्पर्धात्मक बहुदलीय लोकतन्त्र, मानव अधिकार र कानुनी शासन राष्ट्रिय जीवनका आधार भएको भन्दै उनले संविधानको अक्षर र भावनालाई कार्यान्वयन गर्न सरकार प्रतिबद्ध रहेको बताए।
उनले संविधान जतिसुकै राम्रो भए पनि त्यसलाई कार्यान्वयन गर्ने हात इमानदार र सक्रिय नभए कागजमै सीमित हुने बताए। भ्रष्टाचार र दण्डहीनताको जरो गहिरो रहेको स्वीकार गर्दै त्यसलाई उखेल्न सरकार दृढ रहेको उनको भनाइ थियो। प्रशासनिक संरचनाको उपयुक्त आकार निर्धारण, भ्रष्टाचारविरुद्ध शून्य सहनशीलता, प्रशासनमा राजनीतिक तटस्थता तथा योग्यतामा आधारित नियुक्ति प्रक्रियालाई सरकारले प्राथमिकता दिएको उनले बताए।
प्रधानमन्त्री शाहले संघ, प्रदेश र स्थानीय तहबीच सहकारिता, सहअस्तित्व र समन्वयका आधारमा राष्ट्रिय विकासको साझा उद्देश्य हासिल गर्ने सरकारको नीति रहेको बताए। कृत्रिम बुद्धिमत्ता, डिजिटल प्रविधि, साइबर सुरक्षा, नवप्रवर्तन र स्टार्टअपलाई अघि बढाउँदै ज्ञानमा आधारित अर्थतन्त्र निर्माण गर्ने योजना अघि सारिएको उनले जानकारी दिए। डिजिटल सुशासनमार्फत युवाहरूले सडकमा उठाएको सुशासनको मागलाई सम्बोधन गर्ने उनको भनाइ थियो।
रसुवा–भोटेकोशी बाढीबाट भएको क्षति अकल्पनीय र अपूरणीय रहेको उल्लेख गर्दै प्रधानमन्त्री शाहले उद्धार तथा राहतमा सहयोग गर्ने मित्रराष्ट्र, अन्तर्राष्ट्रिय समुदाय, संघसंस्था, निजी क्षेत्र, राष्ट्रसेवक कर्मचारी र आम नागरिकप्रति आभार व्यक्त गरे। नेपाल उच्च विपद् जोखिममा रहेको भन्दै उनले विपद् आएपछि मात्र नभई पूर्वतयारीमै केन्द्रित हुनुपर्ने बताए। जोखिम न्यूनीकरण, पूर्वतयारी, प्रतिकार्य तथा पूर्वसूचना प्रणालीलाई सरकारले उच्च प्राथमिकता दिने उनको भनाइ थियो।
संविधान दिवस हरेक वर्ष आउने भए पनि संविधानको पूर्ण कार्यान्वयन नागरिकका हरेक इमानदार निर्णय, पारदर्शी नियुक्ति र घरदैलोमा पुग्ने सेवामार्फत गर्नुपर्ने प्रधानमन्त्री शाहले बताए। जनताले सुशासन, विकास, समृद्धि र सामाजिक न्यायको अपेक्षा गरेको भन्दै उनले सरकारका हरेक कदम ती आकांक्षातर्फ केन्द्रित रहने प्रतिबद्धता व्यक्त गरे। ‘शहीदहरूको रगतले लेखेको संविधान, हामी कामले पूरा गर्छौँ’ भन्दै प्रधानमन्त्री शाहले सम्पूर्ण नेपालीमा संविधान दिवस तथा राष्ट्रिय दिवस, २०८३ को शुभकामना व्यक्त गरे।
