काठमाडौं । प्रतिनिधि सभाका सभामुख डोलप्रसाद अर्यालले संविधानको सफल कार्यान्वयन र संरक्षणमा संघीय संसदको भूमिका महत्वपूर्ण रहेको बताएका छन्। संविधान दिवस (राष्ट्रिय दिवस) २०८३ का अवसरमा शुभकामना सन्देश जारी गर्दै सभामुख अर्यालले संविधानले परिकल्पना गरेको राज्य व्यवस्था निर्माणका लागि राज्यका सबै अंग, राजनीतिक दल, नागरिक समाज तथा सम्पूर्ण नेपालीबीच सहकार्य, समन्वय र प्रतिबद्धता आवश्यक रहेको उल्लेख गरेका हुन्। संघीय संसदको आधिकारिक विवरणअनुसार अर्याल हाल प्रतिनिधि सभाका सभामुख छन्।
सभामुख अर्यालले सार्वभौमसत्ता र राजकीयसत्ता सम्पन्न नेपाली जनताको आफ्नो संविधान आफैं निर्माण गर्ने आकांक्षालाई मूर्त रूप दिँदै २०७२ साल असोज ३ गते संविधानसभाबाट नेपालको संविधान जारी भएको स्मरण गरेका छन्। संविधान निर्माण तथा संघीय लोकतान्त्रिक गणतन्त्र स्थापनाका लागि भएका आन्दोलन र पछिल्लो समय भएका जनजी प्रदर्शनका क्रममा जीवन उत्सर्ग गर्ने ज्ञात–अज्ञात शहीदहरूप्रति उनले श्रद्धासुमनसमेत अर्पण गरेका छन्।
उनले संविधानको प्रस्तावना र धारा ३ मा व्यवस्था गरिएअनुसार नेपालको बहुजातीय, बहुभाषिक, बहुधार्मिक तथा बहुसांस्कृतिक विशेषतालाई आत्मसात् गर्दै राष्ट्रिय स्वतन्त्रता, भौगोलिक अखण्डता, राष्ट्रिय हित तथा समृद्धिप्रति आस्थावान रहँदै एकताको सूत्रमा आबद्ध हुन संविधान दिवसले प्रेरणा दिने विश्वास व्यक्त गरेका छन्।
सभामुख अर्यालले समयसापेक्ष कानुन निर्माण तथा परिमार्जन, जनसरोकारका विषय उठान र लोकतान्त्रिक मूल्य–मान्यताको जगेर्ना गर्न संघीय संसद प्रतिबद्ध रहेको बताएका छन्। संविधानले परिकल्पना गरेको राज्य स्वतन्त्र, अविभाज्य, सार्वभौमसत्ता सम्पन्न, धर्मनिरपेक्ष, समावेशी, लोकतान्त्रिक तथा समाजवादउन्मुख संघीय लोकतान्त्रिक गणतन्त्रात्मक राज्य निर्माणका लागि राज्यका सबै अंग, राजनीतिक दल, नागरिक समाज र नेपाली नागरिकबीच सहकार्य आवश्यक रहेको उनको भनाइ छ।
अन्त्यमा सभामुख अर्यालले संविधानको मूल मर्म र भावनालाई व्यवहारमा रूपान्तरण गर्न सबैलाई आह्वान गर्दै संविधान दिवस २०८३ को शुभकामना दिएका छन्। उनले संविधानको प्रभावकारिताका लागि मन, वचन र कर्मले समर्पित भएर हातेमालो गर्नुपर्नेमा जोड दिएका छन्।
