आकाश मगर, उदयपुर । त्रियुगा नगर इसाई समाज गाईघाटले त्रियुगा नगरपालिका–९, गहिरुनमा निर्माण गरेको आफ्नै कार्यालय भवन उद्घाटन गरेको छ। कोशी प्रदेश सभा सदस्य नारायण बुर्जा मगरको प्रमुख आतिथ्यमा शिलाअनावरण तथा रिबन काटेर भवनको उद्घाटन गरिएको हो। उद्घाटन समारोहमा उदयपुरका विभिन्न पालिकामा रहेका इसाई समाजका प्रतिनिधि, पाष्टर, अगुवा तथा ३ सयभन्दा बढी ख्रीष्टियन समुदायका सदस्यहरूको सहभागिता रहेको थियो।
कार्यक्रममा विभिन्न पालिकाका इसाई समाजका अध्यक्ष तथा प्रतिनिधिहरूले शुभकामना मन्तव्य व्यक्त गरेका थिए। कार्यक्रमको सञ्चालन आकाश बलम्पाकीले गरेका थिए भने भवन उद्घाटनको धार्मिक विधि आशिष प्रेस्बिटेरियन चर्चका पाष्टर रेभ. श्याम प्रकाश राईले सम्पन्न गरेका थिए। सहभागी वक्ताहरूले नयाँ भवनलाई समुदायको संस्थागत विकास, सहकार्य र सामाजिक सेवाका लागि उपयोग गर्नुपर्नेमा जोड दिएका थिए।
त्रियुगा नगर इसाई समाजका अध्यक्ष खड्ग नारायण श्रेष्ठ ‘फिलिप’का अनुसार कोशी प्रदेश सभा सदस्य नारायण बुर्जा मगरको पहलमा प्रदेश सभाबाट ७ लाख रुपैयाँ बजेट विनियोजन भएपछि विभिन्न चर्च तथा ख्रीष्टियन समुदायको सहयोगमा भवन निर्माण सम्पन्न भएको हो। भवन निर्माणका लागि होम विकले करिब ८ लाख रुपैयाँभन्दा बढी मूल्य पर्ने ८ धुर जग्गा समाजलाई दान गरेका थिए। सोही जग्गामा समाजको कार्यालय भवन निर्माण गरिएको हो।
भवन निर्माण सम्पन्न गरी उद्घाटन गर्न पाउँदा आफूलाई खुसी लागेको अध्यक्ष श्रेष्ठले बताए। उनले भवन निर्माणमा सहयोग गर्ने प्रदेश सांसद, जग्गादाता, विभिन्न चर्च तथा ख्रीष्टियन समुदायप्रति धन्यवाद व्यक्त गर्दै यस कार्यको सम्पूर्ण श्रेय परमेश्वरलाई जाने बताए। समाजले आगामी दिनमा आफ्ना गतिविधिलाई थप व्यवस्थित गर्दै समुदाय तथा समाजको हितमा केन्द्रित गर्ने जनाएको छ।
उद्घाटन समारोहका प्रमुख अतिथि प्रदेश सभा सदस्य नारायण बुर्जा मगरले भवन निर्माणका लागि सहयोग गर्न पाएकोमा खुसी व्यक्त गर्दै भवनका बाँकी निर्माण तथा अपूर्ण काम पूरा गर्न आफ्नो तर्फबाट सक्दो पहल गर्ने प्रतिबद्धता व्यक्त गरे। नेपालको संविधानले धर्मनिरपेक्षताको आधार स्थापित गरेको उल्लेख गर्दै उनले यसको संरक्षण सबै समुदायको साझा जिम्मेवारी भएको बताए। देशको परिवर्तन र विकासमा इसाई समुदायले पनि महत्वपूर्ण योगदान पुर्याउँदै आएको उनको भनाइ थियो।
नयाँ भवनसँगै त्रियुगा नगर क्षेत्रका इसाई समुदायका धार्मिक, सामाजिक तथा मानवीय गतिविधि थप व्यवस्थित हुने अपेक्षा गरिएको छ। कार्यक्रममा सहभागी इसाई समाजका प्रतिनिधि तथा अगुवाहरूले भवनलाई कार्यालय सञ्चालनमा मात्र सीमित नराखी सेवा, सहकार्य, एकता र सामाजिक उत्तरदायित्वको केन्द्रका रूपमा विकास गर्नुपर्ने धारणा राखेका थिए। आफ्नै कार्यालय भवन निर्माण तथा उद्घाटनसँगै उदयपुरको ख्रीष्टियन समुदायको संस्थागत विकासमा नयाँ अध्याय थपिएको सहभागीहरूले बताएका छन्।
