खोटाङ । दिप्रुङ चुइचुम्मा गाउँपालिकाले सामाजिक सुरक्षा भत्ता प्राप्त गर्दै आएका लाभग्राहीको सहजताका लागि विशेष सामाजिक सुरक्षा भत्ता नवीकरण शिविर सञ्चालन गर्ने भएको छ। गाउँपालिकाले आर्थिक वर्ष २०८३/८४ का लागि भत्ता नवीकरण गर्न वडा कार्यालयसम्म पुग्न असहज हुने लाभग्राहीलाई लक्षित गरी शिविर सञ्चालन गर्न लागेको हो।
गाउँपालिकाका अनुसार गाउँपालिकाभित्रका सबै वडाबाट सामाजिक सुरक्षा भत्ता प्राप्त गर्दै आएका तथा हाल गाउँपालिका बाहिर अस्थायी रूपमा बसोबास गरिरहेका लाभग्राहीले आफूलाई पायक पर्ने स्थानमा सञ्चालन हुने शिविरमा उपस्थित भएर भत्ता नवीकरण गराउन सक्नेछन्।
शिविर काठमाडौंको चाबहिल चोकमा २०८३ असोज ३ गते शनिबार बिहान ७ बजेदेखि ९ बजेसम्म सञ्चालन हुनेछ। त्यस्तै, सुनसरीको इटहरीमा असोज ५ गते सोमबार र उदयपुरको गाईघाटमा असोज ६ गते मंगलबार बिहान ७ बजेदेखि ९ बजेसम्म शिविर सञ्चालन हुने गाउँपालिकाले जनाएको छ।
नवीकरणका लागि नेपाली नागरिकताको प्रमाणपत्र र राष्ट्रिय परिचयपत्रको प्रतिलिपि, विधवा महिला तथा ज्येष्ठ नागरिक एकल महिलाको हकमा पतिको मृत्यु दर्ता प्रमाणपत्रको प्रतिलिपि, अपाङ्गता भएका लाभग्राहीको हकमा अपाङ्गता परिचयपत्रको प्रतिलिपि तथा पासपोर्ट साइजको फोटो एक प्रति आवश्यक पर्नेछ।
गाउँपालिकाले सम्बन्धित लाभग्राहीलाई तोकिएको मिति, समय र स्थानमा आवश्यक कागजातसहित उपस्थित भई सामाजिक सुरक्षा भत्ता नवीकरण गराउन अनुरोध गरेको छ। गाउँपालिकाले वडा कार्यालयसम्म पुग्न कठिन हुने तथा बाहिर बसोबास गरिरहेका लाभग्राहीलाई लक्षित गर्दै शिविरमार्फत सेवा सहज बनाउन लागेको जनाएको छ।
