काठमाडौं। दक्षिणकालीस्थित एक रिसोर्टमा सहकर्मीहरूसँग घुम्न गएका राजु तामाङको रहस्यमय मृत्यु भएपछि उनका परिवारजनले घटनाको निष्पक्ष, पारदर्शी र गहिरो अनुसन्धान गर्न सम्बन्धित निकायसँग आग्रह गरेका छन्। परिवारले सामाजिक सञ्जालमार्फत सार्वजनिक अपिल जारी गर्दै घटनाको सत्यतथ्य बाहिर ल्याउन नेपाल प्रहरी, सरकारी निकाय तथा सञ्चारमाध्यमको ध्यानाकर्षण गराएका छन्।
परिवारका अनुसार राजु तामाङ वि.सं. २०८३ साल साउन ५ गते राति आफ्ना १२ जना सहकर्मीहरूसँग दक्षिणकाली एण्ड डोल्लु रिसोर्ट प्रालिमा मनोरञ्जनका लागि गएका थिए। उनीसँग गएका अन्य सबै व्यक्ति सकुशल फर्किए पनि राजु तामाङको मृत्यु भएको घटनाले परिवारलाई गम्भीर शंका र पीडामा पारेको जनाएको छ। घटनाको वास्तविक कारण सार्वजनिक हुनुपर्ने उनीहरूको माग छ।
परिवारले घटनास्थलको स्विमिङ पुल आसपास रगत देखिएको भन्ने जानकारी प्राप्त भएको, साथै घटनाको रातको सीसीटीभी फुटेज उपलब्ध नभएको भन्ने कुरा पनि आफूहरूले सुनेको उल्लेख गरेको छ। यद्यपि यी विषयको सत्यता पुष्टि गर्न आफूहरू सक्षम नरहेको भन्दै सम्बन्धित निकायले वैज्ञानिक र निष्पक्ष अनुसन्धानमार्फत वास्तविकता सार्वजनिक गर्नुपर्ने माग गरिएको छ।
त्यसैगरी, घाइते अवस्थामा रहेका राजु तामाङलाई वयोधा अस्पतालबाट आवश्यक कागजातबिना शिक्षण अस्पताल पठाइएको भन्ने विषयमा पनि परिवारले स्पष्ट जानकारी माग गरेको छ। शिक्षण अस्पतालबाट आउने पोस्टमार्टम तथा अन्य चिकित्सकीय प्रतिवेदन निष्पक्ष, पारदर्शी र तथ्यमा आधारित हुनुपर्ने उनीहरूको आग्रह छ।
परिवारले कसैलाई पूर्वाग्रही रूपमा दोषी नठहराएको स्पष्ट गर्दै सत्य तथ्य स्थापित होस्, कानुनी प्रक्रियाअनुसार दोषी भए कारबाही होस् र निर्दोष भए त्यसको पनि स्पष्ट पुष्टि होस् भन्ने आफ्नो एकमात्र चाहना रहेको जनाएको छ। साथै नेपाल प्रहरी, सम्बन्धित सरकारी निकाय, मानवअधिकारकर्मी, सञ्चारमाध्यम तथा आम नागरिकलाई घटनाको निष्पक्ष छानबिनका लागि सहयोग र आवश्यक दबाब सिर्जना गरिदिन अनुरोध गरेको छ।
