भक्तपुर । भक्तपुर नगरपालिकाले नगरभित्र सञ्चालित सबै सामुदायिक तथा संस्थागत विद्यालयमा आगामी श्रावण १० गतेदेखि आइतबार नियमित पठनपाठन बन्द गर्ने निर्णय गरेको छ। नगर कार्यपालिकाको श्रावण ८ गते बसेको बैठकले उक्त निर्णय गरेको हो।
नगरपालिकाले शुक्रबार जारी गरेको सूचनाअनुसार शिक्षा नियमावली, २०५९ (दशौं संशोधन) लगायत प्रचलित कानुनी व्यवस्था तथा सामुदायिक विद्यालयका प्रतिनिधिहरूसँगको छलफलबाट प्राप्त सुझावका आधारमा आइतबारको नियमित कक्षा सञ्चालन बन्द गर्ने निर्णय गरिएको जनाएको छ।
शिक्षा नियमावलीअनुसार कार्यदिन कम्तीमा २२० दिन हुनुपर्ने व्यवस्था रहेकाले नगरपालिकाले यसअघि आइतबारसमेत विद्यालय सञ्चालन गर्दै आएको थियो। यस अवधिमा नगरपालिकाको निर्णयलाई आत्मसात् गरी विद्यालय सञ्चालनमा सहयोग पुर्याएको भन्दै विद्यालय व्यवस्थापन समिति, शिक्षक, कर्मचारी, विद्यार्थी तथा अभिभावकप्रति नगरपालिकाले धन्यवाद व्यक्त गरेको छ।
नगरपालिकाका अनुसार श्रावण १० गतेदेखि आइतबार नियमित पठनपाठन नहुने भए पनि विद्यालयहरूले उक्त दिन खेलकुद, सांस्कृतिक, सिर्जनात्मक, अतिरिक्त तथा सह–पाठ्यक्रम गतिविधि, शिक्षक व्यावसायिक विकास, बैठक, तालिम तथा अन्य शैक्षिक कार्यक्रम सञ्चालन गर्न सक्नेछन्।
