काठमाडौं। स्वतन्त्र शैक्षिक परामर्श व्यवसायीहरूको एक महत्वपूर्ण बैठक आज काठमाडौंको हात्तिसारस्थित हिमालयन रेस्टुरेन्टमा सम्पन्न भएको छ। बैठकले आगामी आइतबार दिउँसो १२:३० बजे हिमालयन रेस्ट्रो तथा इभेन्ट को सभाहलमा सूचना आदान–प्रदान कार्यक्रम आयोजना गर्ने निर्णय गरेको छ।
बैठकमा सहभागी स्वतन्त्र शैक्षिक परामर्श व्यवसायीहरूले हाल लागू हुने तयारीमा रहेको शैक्षिक परामर्श सेवा सम्बन्धी नियमावली, २०८३ का प्रावधानहरूबारे विस्तृत छलफल गरेका थिए। उक्त नियमावलीभित्र रहेका विभिन्न जटिल, अव्यावहारिक तथा व्यवसाय सञ्चालनमा चुनौती सिर्जना गर्न सक्ने व्यवस्थाहरूका विषयमा व्यवसायीहरूलाई जानकारी गराउनुका साथै यस अघि सरकार र सरोकारवाला बिच भएको वार्ता सम्बन्धी जानकारी गराउने ।
आयोजकका अनुसार कार्यक्रमको मुख्य उद्देश्य नियमावलीका प्रावधानहरूबारे स्पष्ट जानकारी प्रदान गर्नु, व्यवसायीहरूबीच अनुभव र सुझाव आदान–प्रदान गर्नु तथा व्यवहारमा देखिएका कठिनाइहरूलाई कसरी सहज बनाउन सकिन्छ भन्ने विषयमा साझा निष्कर्ष निकाल्नु रहेको छ। साथै, नियमावलीमा रहेका जटिल तथा कार्यान्वयनमा समस्या उत्पन्न गराउने बुँदाहरूलाई व्यावहारिक र व्यवसायमैत्री बनाउन नेपाल सरकारको ध्यानाकर्षण गराउने विषयमा समेत कार्यक्रम केन्द्रित रहने जनाइएको छ।
बैठकमा सहभागी व्यवसायीहरूले शैक्षिक परामर्श क्षेत्र देशको वैदेशिक शिक्षा प्रणालीसँग प्रत्यक्ष रूपमा जोडिएको संवेदनशील क्षेत्र भएकाले यससम्बन्धी नीति तथा नियमहरू निर्माण गर्दा सरोकारवाला व्यवसायीहरूको सुझाव र अनुभवलाई प्राथमिकता दिन आवश्यक रहेको धारणा व्यक्त गरेका छन्। उनीहरूले विद्यार्थीको हित, सेवा प्रवाहको गुणस्तर तथा व्यवसायको दिगोपनलाई ध्यानमा राखेर व्यावहारिक नीति निर्माण हुनुपर्नेमा जोड दिएका छन्।
आगामी सूचना आदान–प्रदान कार्यक्रममा काठमाडौं उपत्यकासहित देशका विभिन्न स्थानबाट स्वतन्त्र शैक्षिक परामर्श व्यवसायीहरूको उल्लेखनीय तथा बाक्लो सहभागिता रहने अपेक्षा गरिएको छ। कार्यक्रममा नियमावलीका विभिन्न पक्ष, त्यसबाट व्यवसायमा पर्ने प्रभाव, सम्भावित समाधानका उपाय तथा सरकारसमक्ष राखिने साझा सुझावहरूबारे विस्तृत छलफल हुने आयोजकले जनाएको छ।
यसका साथै कार्यक्रममा विभिन्न सञ्चारमाध्यमका पत्रकार, शैक्षिक परामर्श व्यवसायी, सरोकारवाला व्यक्तित्व तथा सम्बन्धित पक्षहरूको समेत सहभागिता रहने विश्वास व्यक्त गरिएको छ। कार्यक्रममार्फत प्राप्त सुझाव र निष्कर्षलाई सम्बन्धित सरकारी निकायसमक्ष औपचारिक रूपमा प्रस्तुत गरी नियमावलीलाई थप व्यावहारिक, सहज र प्रभावकारी बनाउन पहल गरिने जनाइएको छ।
आयोजकले सम्पूर्ण स्वतन्त्र शैक्षिक परामर्श व्यवसायी, सञ्चारकर्मी तथा सम्बन्धित सरोकारवालाहरूलाई उक्त कार्यक्रममा समयमै उपस्थित भई आफ्ना धारणा, सुझाव र अनुभव प्रस्तुत गर्न हार्दिक अनुरोध गरेको छ।
