काठमाडौं । लागू औषध नियन्त्रण ब्यूरोको नेपालगञ्ज शाखा कार्यालयबाट खटिएको प्रहरी टोलीले बाँकेको नेपालगञ्ज उपमहानगरपालिका–१८ बाट ४०० ग्राम खैरो हेरोइनसहित दुई महिलालाई पक्राउ गरेको छ। ब्यूरोले शुक्रबार जारी गरेको प्रेस विज्ञप्तिअनुसार उनीहरू लागू औषध खरिद–बिक्री गरिरहेको अवस्थामा पक्राउ परेका हुन्।
पक्राउ पर्नेमा रुकुम पश्चिमको मुसिकोट नगरपालिका–१ निवासी ३२ वर्षीया ललिता बुढाथोकी र बाँकेको नेपालगञ्ज उपमहानगरपालिका–१८ निवासी २४ वर्षीया निशा मगर रहेका छन्। प्रहरीले विशेष सूचनाका आधारमा उनीहरूलाई नियन्त्रणमा लिएको जनाएको छ।
प्रहरीले उनीहरूको साथबाट ४०० ग्राम खैरो हेरोइन तथा तीन थान मोबाइल फोन बरामद गरेको छ। बरामद गरिएको लागू औषध र अन्य सामग्री नियन्त्रणमा लिएर थप अनुसन्धान अघि बढाइएको ब्यूरोले जनाएको छ।
लागू औषध नियन्त्रण ब्यूरोले लागू औषधको अवैध कारोबार, ओसारपसार तथा बिक्री–वितरण नियन्त्रणका लागि देशभर निगरानी र विशेष अभियानलाई निरन्तरता दिइएको जनाएको छ। साथै यस्ता गतिविधिबारे सूचना भए नजिकको प्रहरी कार्यालय वा ब्यूरोलाई जानकारी गराई सहयोग गर्न सर्वसाधारणलाई आग्रह गरेको छ।
