मकवानपुर । बागमती प्रदेश सरकारले गत आर्थिक वर्षमा ४४ वटा सडक पुल निर्माण सम्पन्न गरेको छ। भौतिक पूर्वाधार विकास मन्त्रालयका अनुसार सो अवधिमा मन्त्रालयअन्तर्गत विनियोजित कुल बजेटको ६३.४० प्रतिशत खर्च भएको छ। मन्त्रालयका प्रवक्ता मदनकुमार आले मगरले पूर्वाधार विकासका विभिन्न आयोजनामा उल्लेखनीय प्रगति हासिल भएको जानकारी दिए।
मन्त्रालयका अनुसार आर्थिक वर्षभर १३६.६६ किलोमिटर ग्राभेल सडक स्तरोन्नति, २३१.३१ किलोमिटर कालोपत्रे तथा ढलान सडक निर्माण, छ वटा झोलुङ्गे (पैदलयात्री) पुल, १७ सरकारी भवन, १०२ सामुदायिक भवन तथा १७ उद्यान निर्माण सम्पन्न गरिएको छ। साथै विभिन्न ९४० कार्यक्रममार्फत आवास निर्माणसम्बन्धी कार्यसमेत सम्पन्न भएको मन्त्रालयले जनाएको छ।
यस्तै, मन्त्रालयअन्तर्गत रहेका ४१ वटा रुग्ण आयोजनामध्ये सात वटा आयोजना सम्पन्न भइसकेका छन्। थप २३ वटा आयोजनाको निर्माण कार्य पुनः सुचारु गरी कार्यसम्पादनलाई तीव्रता दिइएको मन्त्रालयले जनाएको छ।
बाँकी ११ वटा आयोजनाको निर्माण कार्य अघि बढाउन आवश्यक समन्वय भइरहेको मन्त्रालयले जनाएको छ। निर्माणमा ढिलाइ गर्ने चार वटा आयोजनामा भने हर्जाना लगाई कारबाही प्रक्रिया अघि बढाइएको मन्त्रालयको भनाइ छ।
