काठमाडौं । नेपाल कम्युनिस्ट पार्टी (नेकपा) का संस्थापक महासचिव पुष्पलाल श्रेष्ठको ४८औँ स्मृति दिवस आज (साउन ७ गते) विभिन्न कार्यक्रमका साथ देशभर मनाइँदै छ। नेकपा (एमाले), नेपाल कम्युनिस्ट पार्टीलगायत विभिन्न कम्युनिस्ट दल तथा शुभेच्छुक संगठनहरूले स्मृति सभा, श्रद्धाञ्जली अर्पण तथा विचार गोष्ठी आयोजना गरी उनको योगदानको स्मरण गरिरहेका छन्।
वि.सं. १९८१ असार १५ गते रामेछापमा पिता भक्तलाल श्रेष्ठ र आमा तुलसीकुमारी श्रेष्ठका माहिला छोराका रूपमा जन्मिएका पुष्पलाल नेपाली कम्युनिस्ट आन्दोलनका अग्रणी नेता मानिन्छन्। सहिद गंगालाल श्रेष्ठका भाइसमेत रहेका उनले लामो समय प्रवासमा बसेर नेपाली कम्युनिस्ट आन्दोलनलाई संगठित र विस्तार गर्न महत्वपूर्ण भूमिका निर्वाह गरेका थिए।
पुष्पलालले कार्ल मार्क्स र फ्रेडरिक एङ्गेल्सद्वारा लिखित विश्वप्रसिद्ध कम्युनिस्ट मेनिफेस्टो लाई पहिलो पटक नेपाली भाषामा अनुवाद गरेका थिए। साथै उनले विभिन्न कृति, लेख तथा वैचारिक दस्तावेजमार्फत नेपाली समाजको वर्गीय विश्लेषण गर्दै कम्युनिस्ट आन्दोलनको वैचारिक आधार निर्माणमा उल्लेखनीय योगदान पुर्याएका थिए।
वि.सं. २००६ वैशाखमा निरञ्जनगोविन्द वैद्य, नारायणविलास जोशी, नरबहादुर कर्माचार्य र मोतीदेवी शाक्यसँग मिलेर भारतको कोलकातामा नेपाल कम्युनिस्ट पार्टी (नेकपा) स्थापना गरेका पुष्पलालले त्यसअघि वि.सं. १९९८ मा प्रेमबहादुर कंसाकार, शम्भुराम श्रेष्ठ, सूर्यबहादुर भारद्वाज र रामराजासँग मिलेर नेपाली प्रजातान्त्रिक सङ्घ गठन गरेका थिए।
नेपाली राजनीतिमा लोकतान्त्रिक शक्तिहरूसँग सहकार्य गर्दै पञ्चायती व्यवस्थाविरुद्ध संयुक्त जनआन्दोलन सञ्चालन गर्नुपर्ने अवधारणाका प्रबल पक्षधर रहेका पुष्पलालको वि.सं. २०३५ साउन ७ गते भारतको नयाँदिल्लीमा उपचारका क्रममा निधन भएको थियो। उनको विचार, राजनीतिक दूरदृष्टि र संगठन निर्माणमा पुर्याएको योगदान नेपाली कम्युनिस्ट आन्दोलनको इतिहासमा आज पनि महत्वपूर्ण मानिन्छ।
स्मृति दिवसका अवसरमा आज नेकपा (एमाले) को राजधानी प्रदेश कमिटीले विशेष कार्यक्रम आयोजना गरेको छ। यसैगरी नेपाली कम्युनिस्ट पार्टीलगायत विभिन्न राजनीतिक दल, भ्रातृ संगठन तथा शुभेच्छुकहरूले पनि देशका विभिन्न स्थानमा श्रद्धाञ्जली सभा, विचार गोष्ठी र स्मरण कार्यक्रम आयोजना गरी पुष्पलालप्रति सम्मान व्यक्त गरिरहेका छन्।
