विराटनगर । कोशी प्रदेश सरकारको आर्थिक वर्ष २०८३/८४ को बजेटलाई लिएर सत्तारूढ दलभित्रै चर्किएको विवाद समाधान गर्न नेपाली कांग्रेस र नेकपा एमालेले अनौपचारिक रूपमा ६ सदस्यीय कार्यदल गठन गरेका छन्। बजेट विनियोजनमा असन्तुलन भएको भन्दै आफ्नै सांसदहरूले विरोध जनाएपछि पटक–पटक स्थगित हुँदै आएको प्रदेशसभा बैठकअघि सहमति जुटाउने उद्देश्यले कार्यदल सक्रिय भएको हो।
असार ११ गते बस्ने तय भएको प्रदेशसभा बैठक बजेट विवादका कारण असार १६ गते सारिएको थियो। मंगलबार पनि सहमति नजुटेपछि बैठक पुनः स्थगित गर्दै असार १८ गतेका लागि तोकिएको छ। कांग्रेसका प्रमुख सचेतक गोपाल तामाङका अनुसार कार्यदलले असन्तुष्ट सांसदहरूको माग, योजनागत असन्तुलन र बजेटलाई सर्वस्वीकार्य बनाउने उपायबारे छलफल गरिरहेको छ। कार्यदलमा कांग्रेसबाट हिमाल कार्की, गोपाल तामाङ र विनोद बान्तवा तथा एमालेबाट रामबहादुर मगर, रमेश बस्नेत र होमबहादुर थापा सदस्य रहेका छन्।
कार्यदलको मंगलबार दिनभर बसेको बैठकमा बजेटको सन्तुलन गुमेको विषयमा दुवै पक्ष सहमत भए पनि त्यसलाई कसरी सुधार गर्ने भन्ने विषयमा निष्कर्ष निस्कन सकेन। असन्तुष्ट सांसदहरूले पूर्वाधार विकासका योजनामा बजेट बाँडफाँट न्यायोचित नभएको भन्दै विनियोजन विधेयकको अनुसूचीमै संशोधन गर्नुपर्ने अडान राखेका छन्। यद्यपि कार्यदलभित्रै बजेट संशोधन गर्ने वा रकमान्तर तथा वित्तीय हस्तान्तरणमार्फत समस्या समाधान गर्ने भन्ने विषयमा फरक–फरक धारणा देखिएको छ।
‘कोशी बजेट विवादले प्रदेश सभाको औचित्यमाथि प्रश्न उठायो’ : सांसद लालबिक्रम थापा
दिनभरको छलफलपछि कार्यदलले मुख्यमन्त्री हिक्मतकुमार कार्कीसँग पनि भेटवार्ता गरेको भए पनि कुनै सहमति हुन सकेन। एमाले प्रमुख सचेतक रमेश बस्नेतले असन्तुष्टि लोकतान्त्रिक र संसदीय प्रक्रियाअनुसार समाधान गरिने बताउँदै असार १८ गतेअघि सहमति जुट्ने विश्वास व्यक्त गरे। कांग्रेस प्रमुख सचेतक तामाङले पनि अब थप बैठक स्थगित गर्न नहुने भन्दै समयमै बजेट पारित गर्न सबै पक्ष सकारात्मक हुनुपर्ने धारणा राखे।
आर्थिक मामिला तथा योजना मन्त्री विदुरकुमार लिङ्थेपले असार १ गते ४० अर्ब ४४ करोड ९८ लाख रुपैयाँको बजेट प्रदेशसभामा प्रस्तुत गरेका थिए। बजेटलाई ‘मन्त्रीमुखी’ र असन्तुलित भन्दै विशेषगरी संसदीय समितिका सभापतिहरू र केही सत्तारूढ सांसदहरूले विरोध जनाइरहेका छन्। असन्तुष्ट सांसदहरूले आवश्यक परिमार्जन नभए बजेटलाई मतदानमार्फत असफल बनाउने चेतावनीसमेत दिएका छन्।
#koshopradesh #Hikmatkarki #LalbikramThapa
