कृष्ण कुँवर, अबुधाबी — गोरखाको पालुङ्टार नगरपालिका–१०, साविक मिरकोट गाविस–९ का ४२ वर्षीय रामेश्वर परियार विगत पाँच वर्षदेखि मिर्गौला रोगबाट पीडित छन् । हाल चितवनको खैरहनी नगरपालिका–४ मा बस्दै आउनुभएका परियारको उपचारका लागि परिवारले आर्थिक सहयोगको अपिल गरेको छ।
२०७८ सालदेखि मिर्गौलासम्बन्धी समस्या देखिएका परियार हाल भरतपुर अस्पताल, चितवनमा नियमित हेमोडायलाइसिस गराउँदै आएका छन् । लामो समयदेखि उपचार गराउँदै आउँदा परिवारको आर्थिक अवस्था कमजोर बनेको छ।
अति विपन्न परिवारका परियारको उपचारमा ठूलो रकम खर्च भइसकेको र परिवारसँग भएको जायजेथासमेत उपचारकै क्रममा सकिएको बताइएको छ। आर्थिक अभावका कारण अहिले नियमित डायलाइसिस, औषधीपचार तथा दैनिक घरखर्च व्यवस्थापन गर्नसमेत कठिनाइ भइरहेको परिवारले जनाएको छ।
रामेश्वर को श्रीमती, १० वर्षीय छोरा र ७ वर्षीया छोरी छन्। परिवारको मुख्य चुनौती उपचार खर्च जुटाउनु बनेको छ। आर्थिक अवस्था कमजोर बन्दै गएपछि उनको उपचारलाई निरन्तरता दिन समस्या उत्पन्न भएको छ।
यसैबीच, परियारको मिर्गौला प्रत्यारोपण गर्ने तयारीसमेत भइरहेको बताइएको छ। प्रत्यारोपणका लागि उनकी श्रीमतीले मिर्गौला दान गर्न तयार भएको परिवारले जनाएको छ। तर, प्रत्यारोपणका लागि आवश्यक खर्च जुटाउन कठिन भएपछि सहयोगी व्यक्ति तथा संघसंस्थासमक्ष सहयोगको अपिल गरिएको छ।
परियारको उपचारमा सहयोग पुर्याउन देश तथा विदेशमा रहनुभएका नेपाली दाजुभाइ, दिदीबहिनी, विभिन्न संघसंस्था तथा सहयोगी मनहरूलाई आफ्नो क्षमताअनुसार आर्थिक सहयोग गरिदिन परिवारले आग्रह गरेको छ।
सहयोगका लागि बैंक विवरण
बैंकको नाम: कृषि विकास बैंक लिमिटेड
खातावालाको नाम: रामेश्वर परियार (RAMESHWOR PARIYAR)
खाता नम्बर: ०५०९१०३०२२५६६०१९
सम्पर्क नम्बर: ९८२३३४८०३२
सानो सहयोगले पनि परियारको उपचारमा महत्वपूर्ण राहत पुग्न सक्ने भएकाले उनको उपचार अभियानमा साथ दिन परिवारले सबैमा हार्दिक अपिल गरेको छ।
