इटहरी । कोशी प्रदेशको आर्थिक वर्ष २०८३/८४ को बजेटलाई लिएर देखिएको विवादप्रति सुनसरी क्षेत्रबाट निर्वाचित प्रतिनिधि सभा सदस्य लालबिक्रम थापाले गम्भीर असन्तुष्टि जनाएका छन्। उनले बजेट निर्माण प्रक्रियामा देखिएको विवादले प्रदेश सभाको औचित्य, विश्वसनीयता र प्रभावकारितामाथि नै प्रश्न खडा गरेको बताएका छन्।
थापाले बजेट विकासको आधार बन्नुपर्नेमा भागबण्डा र स्वार्थको माध्यम बनाइएको आरोप लगाए। “बजेटलाई विकासको आधार होइन, भागबण्डाको माध्यम बनाउने प्रवृत्तिले कोशी प्रदेशको प्रतिष्ठामाथि गम्भीर चोट पुर्याएको छ,” उनले भने। सांसद र मन्त्रीबीचको स्वार्थकेन्द्रित खिचातानीका कारण प्रदेश सभाप्रति जनविश्वास कमजोर बन्दै गएको उनको भनाइ छ। यस्ता गैरजिम्मेवार गतिविधि तत्काल अन्त्य गर्न उनले सम्बन्धित पक्षसँग आग्रह गरेका छन्।
लालबिक्रम थापा सुनसरीबाट निर्वाचित प्रतिनिधि सभा सदस्य हुन्। उनी प्रतिनिधि सभामा सुशासन, विकास, पारदर्शिता तथा जनसरोकारका विषयमा निरन्तर आवाज उठाउँदै आएका सांसदका रूपमा परिचित छन्। सार्वजनिक नीति तथा बजेट कार्यान्वयनमा जवाफदेहिता कायम हुनुपर्ने विषयमा उनले विभिन्न अवसरमा धारणा राख्दै आएका छन्।
कोशी प्रदेशको बजेट विवादका कारण प्रदेश सरकार र सत्ता गठबन्धनमाथि समेत प्रश्न उठिरहेका बेला थापाले प्रदेश सभाको गरिमा जोगाउन पारदर्शी, उत्तरदायी र जनमुखी बजेट प्रणाली अवलम्बन गर्नुपर्नेमा जोड दिएका छन्। उनका अनुसार प्रदेश सभाले जनताको अपेक्षा अनुसार काम गर्न नसके संघीयताको प्रभावकारितामाथि समेत नकारात्मक असर पर्नेछ।
