रोल्पा । रोल्पा जिल्लाको गंगादेव गाउँपालिका–५, फुल्बासमा १० वर्षीय बालक खगेन्द्र बिकमाथि साङ्घातिक आक्रमण भएको घटना सार्वजनिक भएको छ। सामान्य विवादका क्रममा घरभित्र प्रवेश गरेको निहुँमा बालकमाथि कुटपिट गरिएको पीडित पक्षले जनाएको छ।
घटनाका अनुसार स्थानीय भीमबहादुर खत्रीले बालक बिकमाथि कुटपिट गरेका थिए। आक्रमणबाट बालक गम्भीर घाइते भएका छन्। उक्त घटनामा बालकलाई उद्धार गर्न पुगेका गोपाल बिकमाथि समेत धारिलो हतियार प्रहार गरिएको जनाइएको छ, जसका कारण उनी पनि घाइते भएका छन्।
पीडित पक्षले यस घटनालाई सामान्य कुटपिट नभई मानव अधिकारको गम्भीर उल्लङ्घन र कानुनी राज्यमाथिको चुनौतीका रूपमा लिएको छ। उनीहरूले अभियुक्तलाई तत्काल नियन्त्रणमा लिई ‘ज्यान मार्ने उद्योग’ र ‘जातीय भेदभाव तथा छुवाछूत कसूर’ अन्तर्गत कडा कानुनी कारबाही गर्न माग गरेका छन्।
स्थानीयवासीले घटनाले समाजमा अझै पनि जातीय विभेद र हिंसात्मक प्रवृत्ति कायम रहेको देखाएको भन्दै दोषीमाथि कडा कारबाही हुनुपर्ने बताएका छन्।
घटनाबारे प्रहरीले अनुसन्धान सुरु गरेको जनाएको छ भने पीडितहरूको स्वास्थ्य अवस्था र थप विवरण आउन बाँकी रहेको छ।
