काठमाडौं। नेकपाका युवा नेता मंगल सिंह प्रजाले बालेन सरकार तथा राष्ट्रिय स्वतन्त्र पार्टी (रास्वपा) विरुद्धको आफ्नो धारणा परिवर्तन गर्दै सार्वजनिक रूपमा माफी मागेका छन्। सामाजिक सञ्जालमार्फत उनले यसअघि गरेको विरोधलाई “गल्ती” स्वीकार गर्दै अबदेखि कुनै पनि प्रकारको विरोध नगर्ने प्रतिबद्धता जनाएका हुन्।
प्रजा सुकुम्बासी बस्तीमा ऐक्यबद्धता जनाउन पुगेका बेला स्थानीयवासीको आक्रोश सामना गर्नुपरेको थियो। स्थानीयले विरोध गर्दै लखेटेपछि उनी भागेर सुरक्षित स्थानमा पुगेका थिए। उक्त घटनापछि उनले आफ्नो धारणा परिवर्तन गरेको बताइएको छ।
सामाजिक सञ्जालमा लेख्दै प्रजाले बालेन सरकारको विरोध गरेर आफूले गलत कदम चालेको स्वीकार गरेका छन्। उनले अबदेखि सहयोग र समर्थनको बाटो रोज्ने संकेत दिएका छन्, जसले राजनीतिक वृत्तमा नयाँ बहस सिर्जना गरेको छ।
यद्यपि, उनको यस कदमलाई लिएर विभिन्न प्रतिक्रिया आएका छन्। कतिपयले यसलाई आत्मसमर्पण भन्दै आलोचना गरेका छन् भने केहीले परिस्थितिजन्य निर्णयको रूपमा हेरेका छन्। प्रजा यसअघि माओवादी जनयुद्धमा संलग्न पूर्व लडाकु समेत रहेको पृष्ठभूमिले यस घटनालाई थप चर्चामा ल्याएको छ।
