कृष्ण कुँवर (कर्नेलियस) अबुधाबी- जेन्जी आन्दोलनपछिको राजनीतिक परिवर्तनले जन्माएको नयाँ जनादेशले रवि लामिछाने नेतृत्वको राष्ट्रिय स्वतन्त्र पार्टीलाई झण्डै दुई तिहाइ बहुमतसहित सत्ताको केन्द्रमा पुर्याएको छ। यही जनमतको जगमा बालेन शाहको नेतृत्वमा नयाँ सरकार गठन हुँदैछ।
यो केवल सरकार गठन मात्र होइन, जनताको लामो निराशा, आक्रोश र अपेक्षाको प्रतिफल पनि हो। २०४६ सालपछि दोहोरिँदै आएका भ्रष्टाचारका काण्डहरूले थलिएको जनविश्वास अब पुनःस्थापित हुन चाहन्छ। जनताको स्पष्ट माग छ—भ्रष्टाचारको अन्त्य होस्, दोषीहरू कानुनी दायरामा ल्याइउन्, अवैध सम्पत्ति राष्ट्रियकरण गरियोस्, र देशमा वास्तविक सुशासन स्थापित होस्।
तर चुनौती यतिमै सीमित छैन। चर्किंदो महँगी, कमजोर आर्थिक अवस्था र रोजगारीको अभावले थिचिएको जनजीवनलाई राहत दिनु पनि उत्तिकै आवश्यक छ। समृद्धिको नारा केवल भाषणमा सीमित नरही व्यवहारमा देखिनुपर्छ—यही नै अहिलेको सबैभन्दा ठूलो परीक्षा हो।
आज प्रधानमन्त्रीका रूपमा शपथ लिँदै गरेका बालेन शाहप्रति जनताले असाधारण अपेक्षा राखेका छन्। तर इतिहासले देखाइसकेको छ—जनताको विश्वास जित्न गाह्रो हुन्छ, गुमाउन सजिलो। यदि यो सरकारले दृढ इच्छाशक्ति, पारदर्शिता र परिणाममुखी कार्यसम्पादन देखाउन सकेन भने, यही जनादेश चाँडै नै असन्तोषमा रूपान्तरण हुन सक्छ।
यसर्थ, बालेन नेतृत्वको सरकारका लागि यो अवसर मात्र होइन—यो एउटा कठोर परीक्षा हो। अबको केही समयले स्पष्ट पार्नेछ—यो सरकार परिवर्तनको प्रतीक बन्नेछ, कि पुरानै निराशाको पुनरावृत्ति।
कुरा स्पष्ट छ,जनताले अब भोलि होइन व्यवहार चाहेका छन्, भाषण होइन, परिणाम चाहेका छन्।
