काठमाडौं । प्रतिनिधिसभा सदस्य निर्वाचन सफलतापूर्वक सम्पन्न भएको अवसरमा आयोजित विशेष समारोहमा प्रधानमन्त्री सुशीला कार्की ले आफ्नो खुशी र गर्व व्यक्त गरेकी छन्। उनले असामान्य परिस्थितिलाई सामान्य बनाउँदै तोकिएको मितिमै स्वच्छ, निष्पक्ष र शान्तिपूर्ण निर्वाचन सम्पन्न गर्नु नेपालको लोकतान्त्रिक यात्रामा ऐतिहासिक उपलब्धि भएको बताइन्।
प्रधानमन्त्री कार्कीले निर्वाचन प्रक्रियामा महत्वपूर्ण भूमिका निर्वाह गर्ने निर्वाचन आयोग तथा सुरक्षाकर्मीहरूको योगदानको उच्च प्रशंसा गर्दै यस उपलब्धिलाई लोकतन्त्रको सुदृढीकरणतर्फको महत्वपूर्ण कदमका रूपमा व्याख्या गरिन्।
उनले भनिन्, “गत भदौ २३ र २४ गते भएको ‘जेनजी विद्रोह’ पछि मुलुकले जटिल र चुनौतीपूर्ण अवस्थाको सामना गर्नुपरेको थियो। तर, त्यस्तो परिस्थितिलाई पार गर्दै समयमै स्वच्छ र शान्तिपूर्ण निर्वाचन सम्पन्न गर्नु हाम्रो लोकतान्त्रिक प्रतिबद्धताको प्रमाण हो।”
प्रधानमन्त्रीका अनुसार यो निर्वाचनले संवैधानिक प्रणालीको जगेर्ना गर्दै लोकतान्त्रिक मूल्य–मान्यतालाई अझ सुदृढ बनाउने नयाँ अध्यायको सुरुवात गरेको छ। “आम मतदाताले स्थिर सरकार, सुशासन र समृद्धिको पक्षमा स्पष्ट जनादेश दिएका छन्,” उनले उल्लेख गरिन्।
निर्वाचन प्रक्रिया चुनौतीपूर्ण भए पनि सरकारले आफ्नो सम्पूर्ण शक्ति, स्रोत र प्रतिबद्धता यसमा केन्द्रित गरेको प्रधानमन्त्री कार्कीले बताइन्। विशेषगरी कार्यवाहक प्रमुख निर्वाचन आयुक्त रामप्रसाद भण्डारी को नेतृत्वमा आयोगले स्पष्ट कार्ययोजना, व्यावसायिक दक्षता र दृढ इच्छाशक्तिका साथ निर्वाचन सफलतापूर्वक सम्पन्न गरेको उनले प्रशंसा गरिन्।
उनले मतदाता दर्ता प्रणालीमा सुधार, राष्ट्रिय परिचयपत्रसँगको अन्तरआबद्धता, पुनः प्रयोगयोग्य सामग्रीको प्रयोग, पारदर्शी सरकारी खरिद प्रक्रिया, प्रभावकारी सुरक्षा व्यवस्थापन तथा निर्वाचन खर्चमा पारदर्शितालाई ऐतिहासिक मानकका रूपमा उल्लेख गरिन्।
कार्यक्रममा प्रधानमन्त्री कार्कीले अन्तर्राष्ट्रिय मञ्चमा नेपालको लोकतान्त्रिक छवि अझ उज्यालो बनेकोमा खुशी व्यक्त गर्दै सहयोग पुर्याउने सबै सरोकारवालाप्रति आभार प्रकट गरिन्। साथै नवनिर्वाचित जनप्रतिनिधिहरूलाई बधाई दिँदै सफल कार्यकालको शुभकामना पनि व्यक्त गरिन्।
अन्त्यमा, उनले सबै पक्षको सहकार्यमा लोकतन्त्रको सुदृढीकरण, सुशासन प्रवर्द्धन र समृद्ध नेपालको निर्माणतर्फ सरकार निरन्तर प्रतिबद्ध रहने विश्वास व्यक्त गरिन्।
