काठमाडौं। आमूल परिवर्तन रिपब्लिकन पार्टी, नेपालले देशमा रहेका करिब ३० लाख ख्रीष्टियन समुदायको उचित प्रतिनिधित्व सुनिश्चित गर्न सरकारसमक्ष औपचारिक अपिल गरेको छ। पार्टीले हालै जारी गरेको प्रेस विज्ञप्तिमा राष्ट्रपतिमार्फत नेपाल सरकारलाई ध्यानाकर्षण गराउँदै ख्रीष्टियन समुदायको समावेशी सहभागिता सुनिश्चित गर्न माग गरिएको हो।
विज्ञप्तिमा भनिएको छ कि हालको राजनीतिक अवस्था र मन्त्री परिषद् गठनका क्रममा समेत ख्रीष्टियन समुदायको प्रतिनिधित्व नहुनु गम्भीर विषय बनेको छ। ठूलो जनसंख्या भए पनि राज्यका महत्वपूर्ण निकायहरूमा यस समुदायको उपस्थिति न्यून हुनु अन्यायपूर्ण रहेको पार्टीको धारणा छ।
पार्टीले विगतका निर्वाचनहरूमा समेत विभिन्न दलहरूले ठूलो बहुमत प्राप्त गर्दा ख्रीष्टियन समुदायप्रति बेवास्ता गरिएको उल्लेख गर्दै अबको अवस्थामा समानुपातिक प्रतिनिधित्व सुनिश्चित गर्न आवश्यक रहेको जोड दिएको छ।
साथै, संविधान, नियम र कानुनअनुसार समावेशीता र समानुपातिकताको मर्मलाई आत्मसात गर्दै मन्त्रिपरिषद्, संवैधानिक निकाय र अन्य महत्वपूर्ण राज्य संयन्त्रहरूमा ख्रीष्टियन समुदायको प्रतिनिधित्व अनिवार्य गर्न सरकारलाई आग्रह गरिएको छ।
पार्टीका अध्यक्षले हस्ताक्षर गरेको उक्त विज्ञप्तिमा सबै समुदायको समान अधिकार र सहभागिताले मात्र समावेशी र सन्तुलित शासन व्यवस्था सम्भव हुने उल्लेख गरिएको छ।
